Lalaki gipusil, giluba sa Danao

CEBU, Philippines — Patay ang usa ka 27-anyos nga lalaki human kini gipusil ug dayun giluba sa giilang kapuyo sa kanhi niya ka-live-in didto sa Barangay Looc sa Danao City.

Giila ang namatay nga si Ryan Gonzaga. Base sa pasiunang imbestigasyon ni PO1 Mark Anthony Manulat sa Danao City Police Station, si Gonzaga mibisita sa iyang mga anak nga anaa sa poder sa kanhi niya kaipon nga si Marry Chris Talisic.

Wala magdahum ang biktima nga kadto na ang iyang katapusan human naabtan siya sa balay sa kapuyo karon ni Talisic nga si Rey Tante kinsa mipusil kaniya sa makausa ug kahigayun ug wala pa matagbaw, midunggab kaniya sa ikatulo ka higayun.

Daling misibat si Tante human sa krimen.

Sa pagkakaron padayon ang imbestigasyon ug hot pursuit operation batok sa suspetsado.

Gibutyag ni Manulat, bisan ang kanhi kapuyo sa biktima wala usab mopahibalo sa kapulisan may kalabutan sa panghitabo, hinungdan tanan anggulo sa imbestigasyon ang buhaton ug wala usab nila gisalikway ang anggulo sa selos nga usa sa hinungdan sa maong krimen. — LPM (BANAT NEWS)