P60 million ang abot sa resource center sa usa ka tuig—Rodas

CEBU, Philippines – Gibana-banang moabot ngadto sa P60 milyones sulod sa usa ka tuig ang kita sa Probinsiya sa Sugbo gikan sa itukod nga 20-storey resource center.

Base sa gihimong pagtuon sa AS Enriquez Engineering kinsa maoy nihimo sa feasibility study sa maong edipisyo nga moabot ngadto sa 2,218 square meters ang leasable space ang pwede abangan sa matag andana gikan sa 12th floor ngadto sa 20th floor.

Matud ni Danilo Rodas nga ang abang matag square meter moabot sa P550 o  P1.2 milyon ang kita sa  abang sa tibuok usa ka andana sulod sa usa  ka bulan kon 100 percent occupancy.  Gibana-bana nga moabot sa P61 milyones ang kitaon sa probinsiya sa unang usa ka tuig nga operasyon sa resource center.

Sa maong resource center, ang ground floor niini gitagana sa mga business establishment ug ang mosunod nga upat ka floor alang sa pay parking, ug ang gikan sa 7th floor ngadto sa 11th floor maoy alang  sa mga buhatan sa Kapitolyo.

Matud usab ni Rodas nga sa pay  parking gibana-bana nga 183 ang maigo nga sakyanan sa upat ka andana diin 30 pesos ang parking fee matag duha ka oras.

Samtang si Gobernador Hilario Davide, III nagkanayon nga ang kita sa Probinsiya sa Sugbo sa maong resource center maoy ilang ibayad ngadto sa ilang utang  sa Developemnt Bank of the Philippines nga P1.5 bilyones alang sa pagpatukod sa maong edipisyo.

Ang Kapitolyo aduna kini 2.9 percent nga interest rate sa utang ngadto sa DBP sulod sa 10 ka tuig.

Sa iyang bahin, Si Rodas nagkanayon nga gibana-bana nga moabot ngadto sa P1 bilyones ang kitaon sa probinsiya sulod usab sa 10 ka tuig.  (/BDB)(BANAT NEWS)