Gunmen sa Reluya ambush kasohan na
CEBU, Philippines — Nagtukma sa gihimong ballistic examination ang giingong armas ni Jerome Labitad ug ang mga kabhang nga napalgan sa lugar diin nahitabo ang pagpamanhig kang San Fernando Mayor Lakambini Reluya ug mga kaubanan.
"Out of 73 empty shells, 40 didto nag-match sa na-recover nga M16. Therefore, this is the scientific evidence that we are waiting to settle our case against the suspect,” pamahayag ni Police Regional Office-7 director PCSupt. Debold Sinas.
Kahinumduman nga si Labitad ug usa ka Felix Abacajan Jr., maoy mga hitman sa druglord nga si Franz Sabalones ug maoy gipangtumbok nga gunmen sa Reluya ambush niadtong Enero 22 diin positibo silang giila sa mga saksi.
Sa mga nahaunang taho, gigukod si Labitad sa mga polis pinasikad sa pending niini nga warrant of arrest sa paghupot og ilegal nga armas.
Atol sa ginukdanay, giingong nabuhian niini ang dala nga M16 hinungdan nga napaubos kini sa mga polis og ballistic examination.
Ang pangulo sa Special Investigation Task Group-Reluya nga si PSSupt. Manuel Javier Abrugena nagkanayon nga karong semanaha pasakaan na nila og kaso ang mga suspetsado. Nasayran nga si Abacajan adunay pending nga WOA sa illegal possession of explosives, illegal possession of firearms, ug attempted murder.
"For as long as hindi po namin nakukuha or nahuhuli ang mga prime suspects, we are not going to stop," matud ni Abrugena.
Kahinumduman nga naluwas sa hingpit nga kamatayon atol sa ambush si Mayor Reluya apan nakalas gyud ang duha niya ka mga kauban ug ang iyang bana nga si ABC president Ricardo “Nonoy” Reluya. (BANAT NEWS)
- Latest
