Esnatser tipi sa polis

CEBU, Philippines — Patay ang usa ka 22- anyos nga gipasanginlang esnatser nga giingong nakigpinusilay sa mga polis nga nigukod kaniya diha sa eskina sa Natalio Bacalso Avenue ug dalan Tres de Abril sa Barangay Calamba, Dakbayan sa Sugbo niadtong Sabado sa gabii.

Giila sa kapolisan ang napatay mao si Arfil Cabatas Dadibalos , taga Sitio Almacen, A. Lopez Street, sa Barangay Calamba, Dakbayan sa Sugbo.

Base sa imbestigasyon ni PO2 Carlo Dumpa Irizari usa ka Arve Campaner, 23, residente sa Barangay Mambaling.

Sumala pa nga pasahero sa pasaheroang may rota nga 10F si Campaner sa dihang gilabni ang iyang cellphone samtang nag-urong sa karsada ang ilang gisakyan tungod sa traffic.

Ang nanglabni usa ka lalaking nagbisekleta kinsa dali-daling misutoy palayo.  Dihadiha nikanaog sa nakit-ang police outpost si Campaner ug nagpatabang sa on duty nga si Police Officer 2 Melbert Baluntang.

Dali silang nisakay sa motorsiklo ni PO2 Balintang ug gibalikan ang dapit diin nahitabo ang pagpanglabni ug naabtan pa gyud ang suspek nga nagbisekleta ug positibong gitumbok ni Campaner.

Matud pa nga sa dihang gipahunong na kini ug gitumbok sa biktima  giingong miibot kini sa giluklok nga armas ug nakigpinusilay sa polis kang Balintang.

Apan human sa tinubagay og buto sa armas natumba ang suspek human kini naigo sa kalawasan. Gidala sa tambalanan si Dadibalos apan nakabsan kini sa kinabuhi.

Giingong didto na nakuha sa iyang bulsa ang cellphone sa biktima.

Nakuha sab gikan sa suspek ang gigamit niini nga usa ka paltik nga kalibre .38 nga armas nga dunay upat pa ka bala, usa ka holster, ang BMX nga bisekleta niini, tsinelas niini nga puwa ug usa ka brown envelope nga adunay sulod nga PhilHealth MDR form, ug mga mga birth certificates.

Si Campaner nga nakahinabi sa Banat News miingon nga nagkapinusilay gyud ang suspek u gang polis nga nitabang kaniya.

“Na-trauma nako daan sa paglabni sa akong cellphone pero mas na-trauma jud ko sa engkwentro gabii. Pasensya jud miss, but I can’t tell the full statement. Kay hangtod ron gakurog-kurog gihapon ko nga mo flashback ang panghitabo gabii,” si Campaner nagkanayon.

Gi-turnover sa polis ang iyang service firearm nga .9mm Glock 17 pistol aron ipaubos og ballistic examination. (BANAT NEWS)