21 ka heavy equipment paliton
CEBU, Philippines — Gi-review na sa Cebu City Bids and Awards Committee (BAC) ang bidding documents sa Hino Motors, usa ka Manila-Based firm alang sa procurement sa 21 ka heavy equipment.
Matud sa pangulo sa BAC nga si Ronaldo Malacora, ang Hino Motors gipaubos na sa post-qualification stage human naka-comply sa mga required documents.
Ang technical working group (TWG) motan-aw sa tulo sa ka klase sa dokumento nga naglangkub sa financial, legal ug technical documents.
Molanat og duha ngadto na sa tulo ka semana ang post-qualification.
Dugang ni Malacora, ang Hino Motors dili lone bidder, ang ubang mga bidders mao ang Jomara Equipment Corporation ug RDAK Transport Equipment Inc.
Asoy niya, ang duha na disqualified atol sa opening sa public bidding sanglit ang Jomara wala makakab-ot sa required net contracting capacity ug ang RDAK napakyas sa pag-sumetir og ubang dokumento.
Karong tuiga, ang Department of Public Services (DPS) mitagana og P232 million alang sa procurement sa mga bag-ong trucks. Gipili sa DPS nga mopalit og bag-ong trucks aron makamenus sa hauling expenses ang siyudad.
Sukad niadtong October 2016, ang kagamhanan sa siyudad nigasto og P133.7 million alang sa rental sa 21 ka heavy equipment.
Kon ang Hino Motors ma-deklarar nga winning supplier, ang mga ekipo i-utilize dayon.
“Naa man sa provision sa contract nga if available na ang equipment before the end of the contract (rental contract), pwede na putlon”, ni Malacora pa.
Gikan sa Enero hangtud sa buwan sa Hunyo niining tuiga, ang Geo Transport and Construction Inc. mao ang kontraktor alang sa rental sa heavy equipment nga nagkantidad og P65.5 million.
Sa maong kantidad naglangkub kini sa 10 ka compactor trucks ug 11 ka dump trucks nga mag-operate 24 oras. (BANAT NEWS)
- Latest
