Tropa gikan Lanao init nga gisugat

CEBU, Philippines — Kumpletong naabot sa Sugbo ang 329 ka mga sakop sa Regional Mobile Force Batallion-7 ubos sa Police Regional Office-7 nga gipadala sa Lanao Del Norte kagahapong adlawa.

Ang maong mga polis maoy gidugang nga pwersa sa gihimong plebisito alang sa Bangsamoro Organic Law (BOL) sa naasoy nga lugar.

Sakay sila sa barko sa Philippine Navy ug Philippine Coast Guard ug sa ilang pag-abot kagahapon sa buntag sa Pier 1, gisugat sila og banda, painit ug lamano sa mga kadagkuan sa PRO-7 nga gipangulohan ni direktor Debold Sinas.

Gihatagan usab sila og welcome ceremony nga gipahigayon sa Camp Sergio Osmeña diin adunay pasundayag ang PRO-7 dancers.

Si PCSupt. Sinas mipadayag nga iyang gipasigarbo ang katakus sa maong pwersa.

Iyang gibutyag nga atol sa ilang conference uban ang mga kadagkuan sa PRO-10, giila ang PRO-7 nga labing organisado, labing andam ug labing snappy nga contingent nga gi-augment sa lugar.

"Sited for a good job for a well-organized team, di nagkagulo and walang nawala. We are so proud of you. You can now call yourselves as war veterans," si Sinas nagkanayon atol sa iyang speech.

Si PSSupt. Carlito Baja, ang contingent supervisor nagkanayon nga high morale sila sanglit daku ang suporta nga gihatag sa kadagkuan sa PRO-7 logistics, pinansyal ug gipadad-an pa sila og ilahang kaugalingong medical team. Gisamutan kini sa init nga pagtagbo kanila sa Pier 1.

"Di namin akalain na ganito ang pag-welcome sa amin. Akala ko atin-atin lang. Lubos ang pagpapasalamat namin sa inyo sir," sigon ni Baja atol sa iyang pakigpulong sa programa nga gihimo alang sa ilang pag-abot.

Gibutyag ni Baja nga na-swertehan gihapon sila sanglit sa upat ka Improvised Explosive Device (IED) nga mibuto didto, walay nanga-angol nga polis. Nasayran nga sa 329 ka polis, 287 ang gipakatap diin ang 79 nila maoy gibutang sa mga polling centers.

Isip ganti, gihatagan ni Sinas og pito ka adlaw nga bakasyon ang tropa aron makaphuway gikan sa ilang tahas.

Apan pahimangno sa ilang labaw nga dili mobisita og mga balay kalingawan sama sa pasugalan ug imnanan nga maghatag na hinuon og bati nga imahe sa kapolisan.

Matud ni Sinas nga posibleng mapalagpot sa katungdanan ang polis kon masakpan nga naghimo og dautan nga binuhatan samtang nagbakasyon. (Rowena D. Capistrano/DILT)(BANATNEWS)