Katumanan sa dugay nang tinguha

CEBU, Philippines – Pagkahimong lone district sa Dakbayan sa Mandaue katumanan sa tinguha sa mga Mandauehanon. Kini ang gipadayag ni kanhi kongresista Efren Herrera sa naasoy nga distrito kinsa mahinangpon sa maong kalambuan.

Niadtong Hunyo 21, 1969 nahimo nga Chartered City ang Dakbayan sa Mandaue ug gideklarar sa Department of Interior and Local Government nga urbanized city niadtong Pebrero 15, 1991 ug sukad niadto kwalipikado na kining mahimong lone district. Si Herrera maoy kaniadto miduso og balaudnon nga himuong Lone Congressional District ang Mandaue. Ang maong balaudnon hingpit nga nakalabang sa Ubos Balay Balauranan apan nasangit kini sa Senado hangtud nga naabtan sa pagtapos sa termino ni Herrera.

Kun mahingpit nang mahimong Lone District ang Mandaue aduna na kini dugang gahin nga congressional fund gikan sa nasudnong kagamhanan alang sa mga ipatuman nga proyekto ug pagpalambo niini. Magpabilin ang Lungsod sa Cordova ug Consolacion sa ikaunom nga distrito ug mas magmalambuon ang duha ka lungsod kay mas matutokan kini sa distrito. (/DILT)(BANAT NEWS)