Partylists nga na-disqualify nagprotesta

CEBU, Philippines – Ang people's partylist sama sa Action Health Workers, Manggagawa, ug People's Surge nagpasiugda og lihok protesta nga ilang gihimo sa gawas sa rehiyonal nga buhatan sa Commission on Elections (Comelec) human na-disqualify ang ilahang application for accreditation isip partylist.

Si Irish Grace Ramirez, coordinator sa Aksyon Health Workers partylist Cebu nagkanayon nga ang desisyon sa Comelec en banc dili makatarunganon kay mi-comply sila sa tanan nga rekisitos nga gikinahanglan.

"Sa nahimong reason sa pagka-disqualify sa Aksyon Health Workers partylist nga gitan-aw nila nga wala ta nagrepresentar sa marginalized sector pero kon buot tan-awon nga ang nagtukod ug naglangkub sa partylist kay ang atoang mga pasyente, health workers ug health advocates," matud pa ni Ramirez.

Dugang niya nga ang tinuod nga nagbitbit sa tingog sa mga marginalized sector na-disqualify na hinuon nga unta pinaagi sa maong partylist mahatagan og pagtagad ug mahimuan unta og lakang o balaud nga makabenepisyo ang lapad nga katawhan.

Si Jaime Paglinawan, second nominee sa na-disqualify nga Manggagawa partylist nagkanayon nga maayo pa ang ubang partylist nga girepresentar sa mga bana, asawa, ug anak sa mga politiko kay gi-accredit sa Comelec.

Dugang niya nga ang rason nga na-disqualify ang iyang partylist gumikan kay wala kuno ma-specify sa application kon nakadawat ba sila sa pundo gikan sa gobyerno.

"Pag-file nato og motion for reconsideration giklaro didto nga wala gyud mi nakadawat og pundo sa gobyerno kining Manggagawa partylist."

Si Atty. Enerio Ocariza Jr., Regional Election Attorney sa Comelec nagkanayon nga kon sa tukma nga rason nganong na-deny ang maong mga partylist, ang Comelec law department ra ang makatubag. Si Ocariza miingon nga posible nga adunay mga kuwang sa mga rekisitos nga gi-submit nga maoy hinungdan nga na-deny kining maong partylist.

Human sa desisyon sa Comelec ang maong mga partylist miapila sa Korte Suprema para i-nullify ang maong desisyon nga gihimo sa Comelec en banc ug naghulat karon sila sa desisyon. (/DILT)(BANAT NEWS)