Paglimpyo sa baba angay seryosohon

CEBU, Philippines – Mipahinumdum ang Department of Health (DOH) ug Philippine Dental Association (PDA) sa publiko nga importante ang oral health ug accessible na ang mga serbisyo kabahin niini ngadto sa katawhan.

Si Dr. Felix Asoy, presidente sa PDA Cebu Chapter nagkanayon nga ang dental diseases usa sa mga hinungdan nga ang tawo makasinati og heart diseases.

Matud niini nga kon ang streptococcal infection o ang infection nga gumikan sa grupo sa bacteria nga streptococcus kon mokuyog kini sa sirkulasyon sa lawas; sa dugo ug moadto sa kasingkasing, moresulta kini nga mamatay ang tawo.

Si Asoy miingon usab nga kaduha sa usa ka tuig angayan nga magpahiling sa dentist. Ug alang sa mga bata, kon mogawas na ang unang ngipon, kinahanglan nga ipa check-up na kini sa dentist.

Karong Pebrero 9 adunay ablihan nga dental clinic sa Brgy. Tejero, Siyudad sa Sugbo nga gipundohan sa Rotary of Cebu uban sa kooperasyon sa PDA diin libre ang serbisyo sa maong klinika ug hatagan og prayoridad ang mga kabataan.

Pagka ugma niana, Pebrero 10, adunay kick-off ceremony nga pagahimuon sa Plaza Independencia nga salmutan sa mga dentista gikan sa Negros Oriental, Bohol ug Mandaue diin bukas ang maong kalihukan alang sa tanan.

Ang maong kalihukan usab adunay float contest aron mamahimong paagi pag-edukar sa katawhan diin manukad kini sa Plaza Independencia paingon sa Fuente Osmeña ug mobalik sa Plaza Independencia diin adunay pagahimuon nga programa sama sa Little Miss PDA  ug lectures kabahin unsaon pagpakabana sa ngipon.

Samtang si Dr. Edsel Villas sa DOH-7 nagkanayon nga ang dental health facilities accessible ra sa katawhan dinhi sa rehiyon ug nanghinaut sila nga ang umaabot nga resulta sa 2018 National Monitoring and Evaluation Survey mosaka ang gidaghanon sa mga Pilipino nga mibisita sa mga dentista.

Matud ni Villas nga ang kahadlok nga magpahiling sa dentista ug ang kamahal sa pagpatambal mao ang mga nag-unang hinungdan kon nganong dili moduol sa dentista ang katawhan.

Dugang niini nga sa Rural Health Unit adunay libreng serbisyo sa dental clinic, hinuon ang usa ka doctor niini adunay gikuptan nga duha ngadto sa tulo ka lungsod. Bisan paman niini, mahatagan gihapon og atensiyon ang mga pasyente.

Aduna usab dentist deployment project ang DOH diin usa na ang gikuptan nga munisipalidad diin adunay 20 ka dentista ug 20 ra usab ka recipient nga municipality. (/DILT) (BANAT NEWS)