25 ka tawo sikop atol sa tigbakay
CEBU, Philippines — Nikabat sa 25 ka tawo kinsa giingong mga sugarol og manok ang nasikop atol sa gipahigayong pagpangronda sa kapolisan niadtong Domingo sa hapon sa tigbakay diha sa Purok Beauty in the Sky, Barangay Babag, Dakbayan sa Lapu-Lapu.
Si Police Superintendent Mark Gifter Sucalit, hepe sa City Intelligence Branch (CIB) sa Lapu-Lapu City Police Office (LLCPO) ang nangulo sa maong pagpangronda human nila nadawat ang taho labot sa tigbakay diha sa nahisgotang dapit.
Na-recover sa mga polis ang nahibilin nga pusta nga nagkantidad og P1,600, duha ka bihag ug sling bag nga puno sa buwang sa manok uban sa mga kahimanan niini.
Matud ni Sucalit nga nasakmit usab nila ang lima ka mahalon nga manok igtatari nga gibiyaan sa mga tag-iya dihang nakamatikod kini nga naabot ang mga polis.
Ang maong mga dinakpan kasamtangan karong gitanggong sa detention cell sa LLCPO ug gikatakdang pasakaan og tukmang kaso sa maong nilang kalapasan. (BANAT NEWS)
- Latest
