70 tawo nadakpan sa PSEMPO

CEBU, Philippines — Moabot 70 ka tawo ang nasikop sa gipangusgang Province-wide Synchronized Enhanced Managing Police Operation (PSEMPO) sa kapolisan sa Dakbayan sa Danao ug Lapu-Lapu sa miaging adlaw.

Sa Dakbayan sa Danao 40 ka tawo ang nadakpan sa grupo ni Supt. Maribel Getigan sa managlahing operasyon sa kabarangayan. Lima ka tawo ang nadakpan sa gun ban pinasikad sa search warrant sa buhatan og mga armas.

Nasakmit sa operasyon ang tornohan sa puthaw, tulo ka bench grips, tulo ka electric drill, upat ka wala mahuman nga kalibre 45, ug walo ka lower receiver sa kalibre 45, ug uban pang mga piyesa sa armas ug mga kahimanan sa paghimo niini.

Sa buy bust operation nadakpan sab ang 15 ka mga tawo ug ilang nasakmit ang mokabat sa  P280, 704 nga kantidad sa gituohang shabu.

Sa illegal nga gambling ilang nadakpan ang napulo ka mga tawo nga naglakip sa mga babaye ang nadakpan.  Napulo sab ka mananagat nga  nigamit og ilegal nga paagi sa panagat ang nadakpan.

Samtang nasikop sa nagpatrolyang kapolisan sa Presintio 3 sa Lapu-Lapu  City  Police Office (LLCPO) ang 30 ka mga tawo gikan sa Barangay Gun-ob, Poblacion, Looc, Pajo, Canjulao, Kalawisan ug Babag.

Si Police Chief Inspector Wyne Magbanua nga maoy hepe sa kapolisan sa Presinto 3 sa LLCPO miingon nga apil sa mga gihipos ang mga menor de edad tungod kay adunay curfew ordinance ang siyudad.

Apil sa ilang gisikop ang unom ka mga lalaking nag-inom daplin sa karsada  ug usa nga nanigarilyo sa publikong dapit. Samtang tulo ka tawo usab ang gidakop tungod kay nagsuroy-suroy nga naghubo sa ilang pangibabaw ang sapot.

Samtang gidakop usab ang 13 ka estambay diha sa daplin sa dalan ug napulo ang nasakmitan og armas ug mahait nga hinagiban subay sa Oplan Bakal Sita. (BANAT NEWS)