May suspek na sa Reluya ambush

CEBU, Philippines — Gipahibalo ni Police Regional Office 7 Regional Director Chief Supt. Debold Sinas nga nailhan na nila kinsay prime suspect sa pagpamanhig kanila ni Mayor Lakambini “Neneth” Reluya nga gikaangol niini ug sa duha ka body guard ug gikamatay sa bana sa mayor nga si ABC President Ricardo “Nonoy” Reluya Jr., driver nga si Allan Bayot ug Tourism Officer Ricky Monterona niadtong Enero 22, sa Barangay Linao Talisay City.

Matud pa ni Sinas karon Pebrero 6 mapupos ang gihatag kanilang duha ka semana nga tagal aron pagsulbad sa maong kaso.  Karon aduna na silay prime suspect sa maong pagpamanhig apan nagdumili siya pagbutyag sa publiko hangtod dili nila mahinabi ang pamilyang Reluya nga maoy biktima.

Si Sinas kinsa nitambong sa Inter-Agency Security Summit didto sa Lungsod sa Oslob  kagahapon miingon nga ilang unahon sa pagpresentar ngadto sa pamilya kay basin aduna silay ikadugang nga mga impormasyon ug anaa na niini kung moapil sila sa ipatawag nga press conference.

Wala usab motug-an si Sinas kun unsay motibo sa maong prime suspect sa pag-ambush. Una nang gidudahan sa mayor nga may kalabotan sa politika ang pagbanhig kanila. Gitug-an ni Sinas, ilaha na usab gipahibalo si Chief PNP Oscar Albayalde sa dagan sa ilang imbestigasyon human sila gihatagan og duha ka semana pagsulbad sa maong kaso.

Giklaro ni Sinas nga wala sila magpaapektar sa tagal nga gihatag ni Albayalde tungod kay di nila buot ikompromiso ang dagan sa imbestigasyon.

Kahinumduman nga mibahad si Albayalde nga relibohan sa pwesto ang hepe sa Talisay City Police Station nga si Supt. Marlu Conag ug Provincial Police Director Senior Supt. Manuel Abrugena kun di nila masulbad ang kaso sud sa duha ka semana.

Niadtong adlaw nga Sabado gilubong na ngadto sa Dipolog City sa yuta niining natawhan ang bana sa mayor. (BANAT NEWS)