Pagpang-harass lang ang reklamo sa PWD – Bathan

CEBU, Philippines — Gihulagway sa  kampo ni Mayor Luigi Quisumbing nga pagpang-harass ang kaso nga gipasaka ngadto sa buhatan sa Ombudsman-Visayas batok sa mayor sa Person with Disability (PWD) nga kawani sa kagamhanan sa Dakbayan sa Mandaue.

Si Michael Pielago, 44-anyos, nipasangil kang Quisumbing nga nakalapas sa Akta Republika 7277 kun “Magna Carta for Disabled Persons, Oppression” ug ingon man sa Akta Republika 3019 o “Anti-Graft and Corrupt Practices Act”.

Sa pamahayag nga giluwatan pinaagi sa Mandaue City Public Information Office (PIO) si Atty. Elaine Bathan, chief of staff ni Quisumbing naghulagway kang Pielago ug ingon man sa nag-unang upat ka kawani nga nipasaka usab og mga kaso nga naglakip nila ni Damaso Tumulak, Engr. Andres Suson, Florentino dela Paz, Jr. ug Danna Jane Escalante nga mga dumadapig ni incumbent 6th district Congressman Jonas Cortes.

Si Cortes nga kandidato sa pagkamayor sa Dakbayan sa Mandaue sa umaabot Mayo 2019 midterm election maoy nahimong higpit nga kaatbang ni Quisumbing sa iyang pagpasubli sa katungdanan.

Si Pielago niduso sa maong reklamo giingong tungod sa pagbalhin kaniya og buhatan gikan sa House of Mandaue (HOME) o pasilidad alang sa children in conflict with the law (CICL) nga nahimutang sa Sitio Dunggolan sa Barangay Basak sa maong dakbayan  ngadto na sa bag-o niining buhatan nga mao ang  Housing and Urban Development Office (HUDO) nga nahimutang sa ikaduhang andana sa annex building. Natigayon ang pagbalhin kang Pielago pinaagi usab sa gipirmahan ni Quisumbing  nga  memorandum niadtong Enero  7, 2019.

Sa maong reklamo ni Pielago iyang gipasabot nga sanglit adunay kabilinggan sa panglawas lisod ang iyang kahimtang sa pagtuman sa iyang gimbuhaton diha sa HUDO.

Sa nasayran nga si  Pielago nagsugod sa iyang trabaho sa  Mandaue City Social Welfare Office niadtong Septiyembre 1, 2014 dihang si Cortes pa ang mayor sa siyudad ug niadtong Hulyo 26,  2018 gibalhin siya ni Quisumbing ngadto sa HOME.

Si Bathan nipasabot nga ang pagbalhin ni Pielago sa HUDO tungod kay ang maong buhatan nagkinahanglan kini og social worker sa ilang operasyon. BDB, (BANAT NEWS)