Bidding sa bugas napakyas

CEBU, Philippines — Ang Cebu City Bids and Awards Committee (BAC) mi-rescheduled sa bidding sa procurement sa 10 mil ka sakong bugas alang sa Angkas ug motorcycle-for-hire drivers.

Nasayran nga napakyas ang unang bidding nga nahitabo niadtong Martes kay walay bidder ang mipakita og interes nga mosuplay og bugas sa siyudad.

Subay sa procurement laws, ang schedule sa ikaduhang bidding mahitabo sa Pebrero 7, 2019. Ang executive assistant sa mayor nga si Francisco Fernandez miingon nga usa sa hinungdan nga ang maong bidding wala nagmalampuson gumikan sa ubos nga bid price sa bugas. Giangkon niini, ang first failure sa bidding makamugna og kalangay sa distribusyon sa usa ka sakong bugas sa matag qualified Angkas ug habalhabal drivers.

Gumikan niini, gipatas-an nila ang bid price gikan sa P2, 100 ngadto na sa P2,500  matag sako alang sa ikaduhang public bidding.

Nasayran nga ang siyudad mogamit sa P15 million nga approved budget sa city council nga gi-charge sa Philippine Amusement and Gaming Corporation (PAGCOR) funds. “Gipatas-an na nato, hinaut unta nga naa anaay mo-bid sa P2, 500. Wala may misukol sa una nga presyo, gamayan ra sila sa presyo. Dili man sad ta kapugos nila”, dugang ni Fernandez. Samtang ang pangulo sa BAC nga si Ronaldo Malacora miingon nga kon mapakyas gihapon ang ikaduhang bidding, ilang buhaton mao ang canvassing mode sa procurement.

Kini nagpasabot nga dili momenus tulo ka suppliers ang ilang i-canvas ug ang Technical Working Group sa BAC mo-review sa matag bidding document aron masiguro nga mituman sila sa kondisyon sa kontrata.

Ang paghatag og hinabang sa kagamhanan sa siyudad sa mga apektadong drivers mitumaw human ang Supreme Court misuspenso sa operasyon sa Angkas lukop nasud.

Kadtong mga naka-comply sa mga rekisitos, ang makadawat sa usa ka sakong bugas. (/DILT)(BANATNEWS)