Sapa sa Bulacao giprayoridad nga limpiyohan

CEBU, Philippines — Ang Cebu City Environment and Natural Resources Office(CCENRO) makig-alayon sa Department of Environment and Natural Resources (DENR) ug Provincial Environment and Natural Resources Office (PENRO) sa paglimpiyo sa Bulacao River sa sunod buwan.

Kini isip kabahin sa programa sa nasudnong kagamhanan nga limpiyohan ang kasapaan lukop nasud.

Matud sa pangulo sa CCENRO Nida Cabrera nga base sa memorandum sa DENR nagmando kini sa siyudad sa paglimpyo sa river system ang DENR ug PENRO nibisita sa ilang buhatan ug gihisgutan ang  mga angayan nilang buhaton.

Ang PENRO Argao maoy gitahasan nga motabang sa siyudad sa paglimpiyo sa Bulacao River.

Ang maong kalihukan nga mahitabo sa adlaw’ng Biyernes kuhaan kini og mga documentation diin magpalupad sila og drone diha dapit sa nahisgutang sapa.

Matud ni Cabrera nga gihatagan sila og duha ngadto sa tulo ka adlaw sa pagkuha og tukmang documentations.

Sa paglimpiyo nila sa river system tinguha sa CCENRO nga malimpiyohan ang kasapaan ug ma-classify bisan man lang sa class D.

Ang Bulacao River non-tolerable na ang sitwasyon ug ang kahugaw niini maghatag og sakit sa katawhan hinungdan nga mao kini ang giprayoridad sa siyudad.

Human sa 3-day documentation, sa Pebrero 20 mahitabo ang diyalogo sa tanang opisyales sa barangay, people’s organization ug mga establisamento nga duol sa sapa ug sa Pebrero 22 mahitabo ang pagpanglimpiyo.

Nasayran nga 11 kilometros ang gitas-on sa Bulacao River gikan diha sa Barangay Pamutan lusot sa Barangay Inawayan. (BANAT NEWS)