Red alert giisa sa kapolisan sa Sugbo

CEBU, Philippines — Gipaubos karon ang tibuok probinsya sa Sugbo sa red alert status subay sa travel advisory nga giluwat sa embahada sa United Kingdom, usa ka adlaw human nga ang kapolisan ug ang militar mipasalig nga way hulga ang Sugbo bisan sa mga nahitabo didto sa Jolo, Sulu.

Ang hepe sa Police-Community Relations sa Cebu Provincial Police Office nga si Police Superintendent Virgilio Bayon-on mitataw nga  bisag wala silay nadawat nga hulga sa habagatang bahin sa Sugbo giisa nila sa red alert status ang kapolisan.

“Dili nato i-disregard, kung nahitabo didto pwede sad mahitabo diri so red alert gyud ta. Sa pagkakaron safe atong Cebu walay angay’ng ikahadlok ang atong mga foreign and local tourist nga mobisita,” dugang niini.

Gihingusgan nila ang ilang patrol group ingon man ang pag-roving sa mga tourist spots sa probinsya ilabi na sa habagatan ug pahugtan ang seguridad kun adunay mga okasyon o kalihokan aning mga dapita.

Niadtong Domingo miluwat  ang embahada sa UK og dugang pahimangno alang sa mga turistang Briton nga mobisita sa habagatang bahin sa Probinsya sa Sugbo ug sa Mindanao gumikan sa nahitabong pagpamomba sa  Cathedral of Our Lady of Mount Carmel, sa Jolo, Sulu nianang adlawa diin kapin 20 ang nakalas ug 100 ang nangaangol.

Sa pikas bahin, si Konsehal Dave Tumulak, Chairman sa Committee on Public Order and Safety sa Cebu City midasig sa publiko nga tabangan ang kapolisan sa pagbantay ug isumbong dayon sa otoridad kun duna silay mabantayang kadudahan.

Giawhag sab niya ang kapulisan nga ipadayon ang checkpoints ug apilon pagbantay ang mga pantalan, tugpahanan ug uban pa.

Sa Dakbayan sa Mandaue, kapin dos mil ka mga drayber sa traysikol, multicab, V- Hire   ug PUJ  nga nagbiyahe didto ug sa Dakbayan sa Lapu-Lapu nga gipaubos sa seminar sa buhatan sa Land  Transportation Franchising and Regulatory  Board (LTFRB) 7 ang giawhag sab pagtabang sa seguridad.

Si LTFRB 7 Regional Director Eduardo  Montealto Jr.,  maoy nangulo sa maong seminar nga gitambongan usab nila ni Lapu-Lapu City Mayor Paz Radaza ug ni Lapu-Lapu City Police Office (LLCPO) Director  Senior Superentindent  Lemuel Obon.

Gawas sa pahimangno bahin sa pagsunod sa lagda sa trapiko ug luwas nga pagmaneho, giawhag sab sila nga i-report dayon sa kapolisan kun may mamatikdang kadudahan og mga lihok o mga kadudahang butang nga ibilin sa ilang sakyanan. (BANAT NEWS)