10 napatay bisan may Comelec gun ban

CEBU, Philippines – Niabot na og napulo ka tawo ang nangamatay sa mga pagpamusil dinhi sa Sugbo sukad nga gipatuman ang Comelec gun ban sugod niadtong Enero 13, 2019 base sa talaan sa kapolisan.

Atol sa gun ban gidid-an kadtong mga tawong nanagiya og mga armas ilabi na kadtong legal nga nakabaton niini sa pagdala niini sa gawas sa ilang mga panimalay kun wala silay gun ban exemption gikan sa Commission on Elections (Comelec).

Gipangusgan usab ang pagpatuman sa Comelec checkpoints sa mga kadalanan aron pagsanta sa mga krimen nga gigamitan og mga armas. Apan bisan pa niini, daghan gihapon ang nangabiktima sa pagpamusil.

Niadtong Enero 16, 2019, gibanhigan ang barangay kapitan sa Magsico sa Lungsod sa San Fernando nga si  Johnny Arriesgado kinsa gipasanginlang konektado sa self-confessed druglord nga si Franz Sabalones. Nasundan kini niana gihapong gabhiuna sa pagpamusil diha sa Barangay San Roque, Talisay City dihang gipatay ang barangay tanod sa Barangay Tanke nga aktibo batok sa ilegal nga drugas nga si Lyndie Belila.

Pagkasunod adlaw, Enero 17, gi-ambush patay ang kontrobersiyal nga kanhi Cebu City prosecutor nga si Mary Ann Castro diha sa Escario Avenue sa Barangay Camputhaw sa Dakbayan sa Sugbo.

Niadtong Enero 20, usa ka lalaking naila lang sa alyas nga “Idol” nga usa ka drayber sa habalhabal ang gipatay pinaagi sa pagpusil diha sa Barangay Ermita ning dakbayan. Laing pagpamusil ang nahitabo pagkahuman gyud sa Sinulog, Enero 21 dihang nagkapinusilay ang duha ka grupo nga may personal nga panagbangi diha sa Barangay Sambag Uno ning dakbayan sa Sugbo. Nakalas sa maong pinusilay silang Vanzant Navales, ug managamahang Edwin ug Shaun Bacaltos.

Pagkasunod nga adlaw na usab niana, Enero 22,  gi-ambush ang magtiayong sila si San Fernando Mayor Lakambini Reluya ug bana niyang si Barangay Captain Ricardo “Nonoy” Reluya diha sa Barangay Linao, Talisay City. Namatay si Ricardo, ilang drayber ug ang tourism officer sa ilang lungsod.

Niana sab gabhiuna, duha ka mga lalaki ang napalgang patay sa lungsod sa Minglanilla nga giilang sila si Rico Padios, 18, ug Exequiel Dejos, 20, pulos managsilingan sa Purok Lemon Grass sa Barangay Tubod sa mao gihapong lungsod.

Si Police Regional Office - 7 (PRO7) Regional Director Chief Superintendent Debold Sinas miangkon nga dili nila mabantayan ang tanan kay bisan sa checkpoints kutob ra sila sa makita sa mga mata.

“Kung mo agi lang didto (checkpoint), itago lang nila, dili na makit-an. Dili mo pwede magpa abli og compartment, trunks ug dili sila mosugot. Dili mi pwede mag panaog sa tawo nga naa sa sakyanan,” matud niya kay mao kini ang guidelines nga gihatag sa Comelec.

Mipasalig hinuon siya nga maningkamot silang masiguro ang seguridad sa tanan. (Micole Gerard J. Tizon, Imarie Jane D. Madarieta/IBM)(BANAT NEWS)