Ubang parti sa Sugbo makasinati og pag-ulan

CEBU, Philippines – Gilauman nga padayong makasinati og katag ug pat-ak-pat-ak nga pag-ulan hangtud karong weekend ang ubang parti sa Sugbo matud sa Philippine Atmospheric Geophysical and Astronomical Services Administration (PAGASA)-Mactan.

Si Vhan Singson, weather specialist sa PAGASA-Mactan nagkanayon nga gumikan kini sa tail end of a cold front diin makasinati og bugnaw nga hangin.

Ang ubang parti sa Sugbo makasinati og mahinay ngadto sa kasarangang pag-ulan, panugdog ug kilat.

Mahinay ngadto sa kasarangan ang sitwasyon sa kadagatan sa Central Visayas samtang ang Eastern Visayas makasinati og baluron nga kadagatan.

Ang PAGASA nipagawas na kini og gale warning ngadto sa Northern Samar. Ang PAGASA niawhag sa mga namuyo sa bukirang bahin nga dili mokompiyansa ug kanunay kining magmabinantayon.

Ang kanunay nga pag-uwang makahumok kini sa yuta ug delikado sa dahili. ((BANAT NEWS)