Mga kontra sa politika ipatawag

CEBU, Philippines – Mga kontra sa politika ni San Fernando Mayor Lakambini Reluya maoy gitumbok karon sa kapolisan nga persons of interest sa pagpamanhig kanila sa iyang bana ug sa upat nil aka mga kauban diha sa Barangay Linao sa Dakbayan sa Talisay niadtong Martes sa gabii.

“Lahat po sila. May claims po kasi ang mayor na politically motivated so tinitingnan po natin kung sino po yung mga kalaban niya sa politika,” sigun sa direktor sa Cebu Provincial Police Office nga si Senior Supt. Manuel Javier Abrugena ngadto sa Banat News.

Gipugngan ni Abrugena ang mga pangalan sa maong mga POIs, apan ang usa kanila daan ng mihimakak nga may kalambigitan niini.

Gusto ni Abrugena makadungog sa habig sa mga kontra sa politika sa magtiayon. Naangol sa maong ambush ang mayor ug duha nil aka bodyguards, apan nakalas gyud iyang bana nga si ABC-President Ricardo Nonoy” Reluya Jr. ug duha sab nila ka bodyguards.

“Karapatan din naman nila yun na pabulaanan yung sinasabi ng victim,” sigun ni Abrugena.

Gipasalig sa Special Investigation Task Group nga dili fall guy ang ila unyang makasohan. Ang SITG –Reluya pangulohan ni Superintendent  Virgilio Bayon-on.

Niadtong Myerkules, gihagit ni PNP Chief Oscar Albayalde ang PRO-7 nga sulbaron ang imbestigasyon sa maong kaso sulod sa duha ka mga semana kay kun dili pangrelibohan ang mga opisyal sa kapolisan dinhi. Ang SITG  langkuban sa sa Regional Intelligence Division, Criminal Investigation and Detection Group-7 (CIDG-7) and the PNP Regional Anti-Cybercrime Division, San Fernando Police station, Talisay Police station ug pangulohan sa Cebu Provincial Police Office.

Giingong ang PNP Regional Anti-Cybercrime Division maoy gitahasang mohiling sa cellphone sa mga biktima aron masubay ang mga gikatahong nanghulga sa ilang kinabuhi.

Kagahapong adlawa gihimo sa Talisay City Police ang re-enactment sa pagbanhig sa mga Reluya. Si Supt. Marlu Conag, hepe sa Talisay City Police Station nagkanayon  nga mangita sila og mga testigos nga makatabang sa imbestigasyon.

Samtang si Mayor Eduardo Gullas sa Siyudad sa Talisay  nanghinaut nga mabuhat sa kapulisan ang ilang trabaho.

“Every decent Cebuanos condemns. I hope that authorities has leads already in their investigation,” matud pa ni Gullas.

Gawas sa bana sa mayor, namatay sab si Ricky Monterona, tourism officer ug si Allan Bayot, drayber sa van. (Gabriel Bonjoc/IBM)(BANAT NEWS)