Taga Silangan II nangayo og kabalhinan

CEBU, Philippines – Nanawagan ang mga residente sa Silangan II, C. Arellano Boulevard, Barangay Tejero ug Tinago, Siyudad sa Sugbo kang Mayor Tomas Osmeña nga hatagan sila og kabalhinan human gipatuman ang clearing operation kagahapon.

Kahinumduman nga niadtong Abril 2018 si Mayor Osmeña mipagawas og clearing order apan nalangay ang pagpatuman niini human mihatag ang mayor og usa ka semana nga lugway. Ang mga residente sab sa dapit nahatagan og higayon nga maka-file og injunction apan gi-deny kini sa korte.

Hinungdan nga gipatuman sa Prevention, Restoration, Order, Beautification and Enhancement (PROBE) Team ang clearing order kagahapon.

Matud sa pangulo sa PROBE nga si Raquel Arce, gipatuman nila ang maong clearing order aron mahibalik ang sidewalk sa lugar.

Si Arce miasoy nga bisan pa man sa financial assistance nga gihatag ngadto sa mga residente, wala sila moguba sa ilang  mga balay hinungdan nga sila na ang mihimo niini.

“Inspite sa ilang nadawat nga financial assistance, mga P5,000 man guro to, adtong last year. Katong pirmerong hugna sa ilang clearing, pero of course ang uban nagmagahi sa pagdawat they prefer to file it in court”, asoy ni Arce.

Apan si Cristina Pardillo, presidente sa Lot 1 Residence Homeowners Association sa Silingan II, Brgy. Tejero mohangyo kang Mayor Osmeña nga kon papahawaon sila hatagan sila og kabalhinan.

Kini miasoy nga dihang gibasura ang ilang injunction, mi-apelar sila ug naghuwat pa sila sa resulta sa motion for reconsideration apan nahibulong na lang sila nga gipatuman na dayon ang clearing order bisan og wala pay resulta.

“Wala ko kasabot, ang balaud para ra diay sa datu, so manawagan lang mi Mayor kung nagkinahanglan siya og tawo ning panahona mohangyo ko kung iya man gani ming kuhaon diri dili mi mosukol, dili mi mobalibad kay dili ni amoang lugar mohangyo lang ko hatagan lang mig kabalhinan”, ni Pardillo pa.

Midugang sab kini nga gamay ra ang ilang gipangayo ug nanghinaut nga makonsensiya ang mayor.

“Mao nga manawagan gyud ko, kung naay konsensiya ang Mayor kay kahibawo ko nagkinahanglan siya og boto sa mga tawo karon tungod kay hapit na ang election, kani kung mahimo kung iya mi tabangan akong pasaligan kining tanang Silangan mo-support niya mao ra gyud na akong gihangyo, ang amo lang kabalhinan, wala siya’y konsensiya kung ingon ani lang ang pamaagi”, dugang ni Pardillo. (/DILT)(BANAT NEWS)