Kaso ni Castro gipasusi sa Malacañang

CEBU, Philippines — Wala ma-pressure ang kapolisan sa mando sa palasyo nga paimbestigaran kon aduna ba silay pagkuwang sa seguridad nunot sa nahitabong pagpamanhig kang Fiscal Mary Ann Castro niadtong Enero 17 taliwa sa heightened alert status alang sa Sinulog ug sa gipatuman nga election gun ban.

Sigon sa direktor sa Police Regional Office-7, Police Chief Supt. Debold Sinas nga giplanohan nang daan sa utok sa krimen ang pagpatay ni Castro ug dili angayang basolon ang kapolisan.

"There's a difference between pre-meditated killing and random killing. Si Castro giplanohan gyud siya by the way it is done. Alam mo pag pre-meditated lisud kaayo ma-prevent lalo na kung wala kay istorya sa amoa," matud ni Sinas.

Gipasabot sab niini nga wala silay kasayuran nga naabot na sa Cebu si Castro ug kon aduna ba kini hulga sa kinabuhi.

Depensa ni Sinas nga gibuhat na nila ang tanan aron mapugngan ang krimen ilabi sa syudad sa Sugbo diin gipahigayon ang Fiesta Senyor.

"Basta pre-meditated lisud kaayo mag-istorya ka og lapses. I will not blame our police kay in place na ang among checkpoints and everything. It's a pre-meditated case and we did our best to prevent any crimes," dugang niini.

Ang hepe sa Cebu City Police Office nga si Police Senior Supt. Royina Garma maoy mangulo sa giumol nga Special Investigation Task Group inubanan sa Criminal Investigation and Detection Group-7 (CIDG-7) bahin sa kaso ni Castro.

Sila ubos sa superbisyon ni Police Senior Supt. Anghelito Dumangeng, deputy Regional Director for Operations sa PRO-7.

Gitug-an ni Garma nga wala pa silay update sa maong kaso sanglit na-busy sila sa seguridad sa Sinulog. Karong nahuman na ang Sinulog, padayon na sila sa ilang imbestigasyon.

Nasayran nga anaa sa heightened alert status ang kapolisan sa tibuok buwan sa Enero subay sa pagpangandam sa Sinulog samtang gisugdan niadtong Enero 13 ang election gun ban.

Kahinumduman nga si Castro kinsa nadestino na sa Masbate, giingong nakigpanihapon sa iyang mga higala sa usa ka restaurant sa Cebu Business Park.

Sa dihang paingon na kining mipauli, gibanhigan siya sa nag-inusarang lalaki nga nagsakay og motorsiklo sa may Escario Extension, habig sa Brgy. Kamputhaw, Dakbayan sa Sugbo. Patay diha-diha dayon ang biktima.

Anggulo sa trabaho, drugas ug personal nga kabangi ang gitan-aw karon nga motibo sa mga imbestigador. (BANAT NEWS)