Pangandam sa seguridad sa Sinulog 2019 plantsado na

CEBU, Philippines – Contingency plan sa Cebu City Police Office alang sa Sinulog 2019 plantsado na samtang ang Armed Forces of the Philippines-Taskforce Cebu nagkanayon nga wala silay namonitor nga hulga sa terorismo subay sa maong kasaulogan.

Sumala pa ni PCInsp. Wilbert Parilla, hepe sa CCPO operations branch nga sa ilang giandam nga contingency plan, aduna silay tulo ka mga gipangagpas nga mahitabo ug plano kon unsaon kini pagresponde.

Una mao ang pagpamomba ug posibleng mahitabo nga pagpamusil taliwala sa bagang duot sa katawhan diin moresulta unya og stampede. Gitinguha nila ang 11 ka sector sa rota sa foot procession ug sa Sinulog Grand Parade diin sa matag sector, gawas sa mga polis aduna say mga augmentation gikan sa AFP, mga emergency response units ug force multipliers ingon man mga bomb sniffing dogs.

Subay niini, kagahapon mihimo og Simulation Exercise (SIMEX) ang mga awtoridad ug mga volunteers sa Fuente Osmeña Circle aron masuta kun unsaon nila pagresponde kon adunay kakulian nga mahitabo atol sa grand parade ug sa foot procession. Gihimo ang SIMEX uban ang PNP, AFP, Cebu City Quick Response Team, ug K-9 units.

Dugang niini nga moabot sa unom ka libo ang mobantay sa seguridad walay labot sa ipakatap nga mga nakasibilyan nga mga polis gikan sa Regional Intelligence Division nga maoy maniid sa palibot.

Samtang ang direktor sa Cebu Provincial Police Office, PSSupt. Manuel Abrugena nagkanayon nga gawas sa augmentation nila sa siyudad, motabang sab sila sa pagbantay sa mga pantalan sa probinsiya.

Si AFP-Taskforce Cebu Commander Noel Baluyan miingon nga wala silay namonitor nga mga hulga sa terorismo sa Cebu.

Giingong aduna silay nasigpatan nga mga private armed groups sa Lungsod sa Tuburan ug Tabuelan nunot sa nagkaduol na nga piniliay.

Si Cebu Archbishop Jose Palma miawhag sa mga deboto ug sa mga mobisita sa Dakbayan sa Sugbo, ilabi na sa Basilica Minore del Sto. Niño nga mosunod kon unsay nalatid sa balaud kay alang man kini sa pagpatuman sa hugot nga seguridad ug kaluwasan sa tanang katawhan nga makigsaulog sa maong daku nga okasyon sa Sugbo matag tuig. (Rowena D. Capistrano ug Nichole Alexis A. Abas/DILT)(BANAT NEWS)