Mayor Quisumbing mipasaka na og kaso

CEBU, Philippines — Gipasaka na gyud ni Mandaue City Mayor Luigi Quisumbing ang  annulment  of  deed of sale niadtong Martes sa buntag sa Enero 19 sa tinguha nga mabawi ang 3.5 ka ektaryang luna nga nahimutang sa Brgy. Looc. Nagkuyog sila si Mayor Quisumbing ug Bise Mayor Carlo Fortuna uban ang taga City Legal Department alang sa pormal na nga pagsang-at sa kaso ngadto sa buhatan sa Mandaue City Hall of Justice.

Si Mayor Quisumbing mihulagway nga sa labing daku nga nahitabong  pagpangurakot sa  kagamhanan sa Dakbayan sa Mandaue sanglit ang 3.5 ektaryang  luna, gibaligya ngadto sa EC Ouano Development and Management Corporation (Ecodemcor) og P50 matag metro kwadrado.

Gitataw sa mayor nga kining ilang gihimo isip pagpakita kon unsa sila kaseryuso sa ilang paggukod sa mga nalambigit sa kurapsyon nga nahitabo sa lokal nga pangagamhanan.

Nasayran nga ang maong pagbaligya sa luna sa barato kayo nga presyo nahitabo niadtong panahon ni kanhi mayor ug karon kongresista Jonas Cortes nga maoy iyang kaatbang pagka mayor sa dakbayan sa umaabot nga piniliay. Gipasabot ni Quisumbing nga gihimo nila ang pagbawi sa maong luna kay mao kini ang butangan unya sa usa ka bilyon ka pesos nga proyektong pabalay ni Preisdente Rodrigo Duterte nga gihatag sa siyudad.

“It is important to us to be able to set this transaction right, so that we would be able to recover the property for the benefit of the future generations of Mandauehanon,” matud pa ni Quisumbing.

Ang kampo ni kongresista Cortes pinaagi sa iyang abogado mipadayag na sa ilang kaandam sa pagtubag sa maong kaso ngadto sa korte.

Nunot niini si Atty. Jamaal Calipayan nga maoy  chief-of-staff ni Cortes mipadayag nga labing maayo nga  mapadangat na kini ngadto sa korte sanglit mao man ang  tukmang lugar sa ilang  pagpasabot sa ilang tubag sa mga pasangil nga giingong adunay sambog sa pamolitika.  DILT, (BANAT NEWS)