Eco-stations dili alang sa mga establisamento

CEBU, Philippines — Bisan sa mga kalihukan nga gipahigayon sa Siyudad sa Sugbo subay sa kapistahan ni Senior Santo Niño ug paghugop sa daghang tawo mabantayan nga limpiyo gihapon ang palibot sa dakbayan.

Ug si Cebu City Mayor Tomas Osmeña nakadayeg niini ug nagpasalamat sa Barangay Environment Officers (BEOs) kinsa usa sa mga nakatampo sa kalimpiyo sa siyudad.

Sayo pa, ang Cebu City Environment and Natural Resources Office (CCENRO) nagmontar og eco-stations diha sa Plaza Independencia, Plaza Sugbo, Fuente Osmeña ug Imus road.

Ang pangulo sa CCENRO Nida Cabrera nagkanayon nga 24 ka eco-stations ang ilang na-set up ug ang ilang mga BEOs gigamit usab nila isip mobile human receptacle nga gisugdan niadtong adlaw’ng Huwebes hangtud karon.

Matud ni Cabrera nga daghang mga lugar sa siyudad nga ang Department of Public Services (DPS) maglisod og kolekta sa basura hinungdan nga ni-facilitate sila nga mo-pick up sa mga magpundo nga basura. Nunot niini, gibutyag ni Cabrera nga aduna sila’y gamay nga problema sa mga establisamento sama sa mga bar ug mga tindahan diha sa Plaza Independencia ug Fuente Osmeña tungod kay adto naman molabay og basura sa eco-stations. Gipasabot ni Cabrera nga ang eco-stations gimontar dili alang sa mga tindahan.

Si Cabrera niluwat og kamanduan nga dakpon ang tindahan nga molabay og basura diha sa eco-stations ug isyuhan sila og ticket tungod kay nagpasabot kini nga ang maong tindahan dili responsable sa ilang waste management. (BANAT NEWS)