Rector Nohara wala magdahum sa gasa sa Sto. Niño

CEBU, Philippines — Ang kasamtangang rector sa Basilica Minore del Sto. Niño nga si Rev. Fr. Pacifico Nohara Jr, OSA, wala magdahum nga mahimo siyang caretaker sa imahe ni Senior Santo Niño.

Ikatulo sa upat ka managsuon ug deboto sa Balaang Bata sukad pa sa ilang pagkabata, magtambungan na sila sa iyang pamilya sa pista sa Siyudad sa Sugbo bisan og taga Isla sa Camotes sila.

Asoy ni Nohara nga tuig 1990 nga Fiesta Senyor sa dihang nakasugat og disgrasya ang iyang maguwang ug ilang gidala sa usa ka pribadong ospital sa dakbayan.

Sumala pa sa rector nga nag-ampo siya atubangan sa imahe sa Sto. Niño sa kapilya sa maong tambalan diin iyang gipangayo nga ayuhon na ang iyang igsuon ug dili mahimong baldado. Didto iyang gisaad nga kon matuman ang iyang pag-ampo, iyang ihalad ang kaugalingon sa pagpangalagad niini.

Dugang niya nga human sa unom ka oras nga operasyon sa iyang maguwang, ang mga doktor miingon nga dili siya makahatag og kasigurohan nga mabalik kini sa normal.

Apan sulod sa pipila ka bulan, naulian ug mibalik sa normal ang kahimtang sa iyang maguwang hinungdan nga iyang gituman ang iyang saad.

Inay nga sa Missionaries of Sacred Heart siya mosulod, sa Augustinian community siya napunta ug wala siya magdahum nga mahimo siyang caretaker sa imahe sa Balaang Bata.

Gibutyag sa rector nga mahinangpon siya nga nadala sa Chong Hua Hospital ang imahe ni Sto. Niño sa unang higayon niadtong miaging semana ug mapasalamaton siya niini kang Konsehal Dave Tumulak nga nahatagan kini og katumanan. (/DILT)(BANATNEWS)