Gisuspenso nga kapitan di munaog sa puwesto

CEBU, Philippines — Nangusug si suspended Mambaling Barangay Captain Gines Abellana nga dili siya mukanaog sa iyang puwesto bisan pa og nahimo na nga acting Barangay Captain si Anne Marie Vestil Palomo.

Si Abellana gisuspenso sa Cebu City Council,  apan miingon siya nga wala niya kini gitahud tungod kay bugtong ang Department of Interior and Local Government (DILG) lang ang dunay    katungod  nga mosuspenso og   opisyal.

“Unsa man diay, I cannot run away from my people. Wala man ko nagsilbi para kanila, nagsilbi ko sa mga tawo, bahala na’g unsa’y mahitabo even if it will cost my life, it’s okay. Basta I did it to defend my people”, matud pa ni Abellana.

Kahinumduman nga niadtong Martes, ang Konseho sa siyudad nisuspenso kang Abellana sulod sa 24 ka buwan gumikan matod pa sa alegasyon nga wala pag-release niini sa honoraria ni Palomo ug laing tulo ka mga konsehal sa barangay gikan sa July hangtod sa December 2018.

Ang suspension nitumaw human sila si Palomo, Edwil Managbanag, Victoriano Laborte ug Neonita Cuestas misang-at og reklamong abuse of authority batok ni Abellana.

Si Palomo maoy number one elected barangay konsehal ug ubos sa balaod kun ang barangay kapitan masuspenso o mawagtang sa serbisyo ang first councilor ang mopuli. Niadtong Miyerkules sa hapon, ang Sangguniang Panlungsod (SP) ni-serve sa suspension order kang Abellana ug silang Palomo ug ang tulo ka konsehal gihatagan sab og kopya.

Si Abellana nangayo og legal opinion sa DILG-Cebu City aron mahibaw-an ang legality sa pag-asumir ni Palomo sa katungdanan kagahapon human iyang nasayran nga si Palomo nihurar kang Mayor Tomas Osmeña aron makalingkod isip acting barangay captain.

Sa laing bahin, daw nahisama sa usa ka 'outcast' si Talisay City councilor Doroteo Emit kinsa maoy bugtong konsehal nga wala mahatagi og motorsiklo.

Si Bise Mayor Alan Bucao miingon nga kun siya lang ang pagbut-on dili niya ihikaw ni Emit ang motorsiklo nga magamit sa iyang messenger o staff, apan ang desisyon nagagikan sa mayoriya sa konseho busa iya lang kini nga gisunod.

Matud pa ni Bucao nga nasagmuyo ang konseho ni Emit kay sila gipasakaan man og kaso sa grupo sa Urban Poor nga gituohang si Emit ang nagpaluyo. Asoy pa niya nga nipadayag ang konseho kaniya nga basin unya kun gamiton ra sab ni Emit sa iyang pamolitika ang motorsiklo.

Samtang si Emit nihulagway ni Bucao nga usa ka bakakon labot sa iyang gipadayag nga mayoriya sa konseho ang nidesisyon nga dili tagaan og motorsiklo.

Matud pa niya nga dili siya ang nipasaka og kaso sa konseho kun dili ang City of Talisay-Federation Home Owners Association (CT-FEDHOA). (BANAT NEWS)