Election Gun Ban sugod Domingo
CEBU, Philippines — Sugdan na karong Domingo ang Election Gun Ban dungan usab sa pagsugod sa election period nga mulungtad hangtod sa Hunyo 12.
Kagahapon nagpahigayon og Regional Joint Security Control Center (RJSCC) and Regional Law Enforcement Coordinating Committee (RLEC7) meeting ang mga otoridad kauban ang Regional Director sa Commission on Elections-7 nga si Atty. Rafael Olaño.
Lakip sa gihisgotan mao ang pagpahigayon og mga checkpoints sa kapolian ug kasundalohan kauban ang COMELEC labot sa gun ban.
Matud pa ni Olaño nga wala ray nausab sa mga patakaran sa mga COMELEC checkpoint niadtong nakalabay’ng mga election period.
Sama kaniadto, sa paskin sa COMELEC checkpoint nakabutang gihapon ang pangalan sa election officer ingun man sa hepe sa kapolisan nga nagpahigayon og checkpoint.Kini aron nga adunay matawagan ang publiko kun adunay himuong pagpanglapas ang mga otoridad nga nag-checkpoint.
Ang direktor sa Police Regional Office-7 nga si Chief Supt. Debold Sinas mipahimangno sa publiko nga mas bug-at ang kasong atubangon sa madakpan.
Gawas sa illegal possession of firearms, giingong patungan pa kini og pagpanglapas sa election gun ban.
Samtang, sa laing press conference ang direktor sa Cebu City Police Office nga si Senior Supt. Royina Garma nagkanayon nga sugod karong Domingo, 24 oras na ang ipahigayong checkpoint sa tanang portal sa syudad sa Sugbo.
"Dun sa mga boundaries sa Cebu City we will establish a 24/7 checkpoints," matud pa ni Garma.
Gipahinumduman sa maong hepe ang mga gun holders nga atol sa election period, walay bisa ang gihuptan nilang license to carry firearm.
"Please be reminded sa mga gun holders na effective 12:01 of January 13 start na ng election gun ban so they are not allowed to bring their guns outside their residence," pasidaan pa ni Garma.
Matud pa ni Sinas nga dili makatandog ang kasaulogan sa Fiesta Señor sa Sugbo sa ilang ipahigayong lapad nga COMELEC checkpoint.
"Kasagarang gipang-augment for Cebu City is from RMFB (Regional Mobile Force Battalion) so other PPO and CPO steady lang," sigun ni Sinas. (BANAT NEWS)
- Latest
