Tulo ka “Salisi” gidemalas nadakpan

CEBU, Philippines — Tulo ka giingong miyembro sa “Salisi Gang” nadakpan sa kapolisan human namiktima og Koreano diha sa F. Cabahug St., Barangay Kasambagan ning Dakbayan sa Sugbo niadtong Miyerkules sa gabii. Ang mga nadakpan giila nga sila si Marvin Candia Cañete, 23, residente sa Sitio Bato Carbon, Barangay Ermita; Genesis Bohol Labrador, 22, residente sa Private, Barangay Sambag 1; ug si Melbert Lahoy-Lahoy Camay, 27, residente sa Sitio Purok 9, Pitogo, Consolacion Cebu.

Ang biktima giilang si Hong Grobui, 44, nga gikawatan sa grupo sa iyang mobile phone nga nagkantidad og P25 mil.

Si Chief Inspector Dindo Alaras, hepe sa Mabolo Police Station, nagkanayon nga gi-snatch sa mga suspek nga nagsakay og sakyanan ang cellphone sa biktima apan gigukod kini sa Koreano hangtod sa nakasugat kini og polis ug daling nitabang paggukod.

Dugang ni Alaras, aduna pa’y mga kauban nga duha ka babaye ang mga suspetsado nga nakaikyas. Nasakmit gikan sa mga suspetsado ang butang sa biktima, laing mga ebidensya nga mga nagkalaing-laing currency sa kwarta, usa ka passport sa laing langyaw, ug mga nagkalain-laing identification cards nga gituohang gikan sa uban nilang biktima.

Nakuhaan usab ang mga suspetsado og pito ka gramong gidudahang shabu nga mobalor sa P55,000. Giawhag sa kapolisan ang mga laing nabiktima nga mopatim-aw ug mopasaka og kaso kanila. Imarie Jane D. Madarieta, USJ-R Intern, IBM (BANAT NEWS)