Police help desks imontar; medical teams ipakatap

CEBU, Philippines – Magbutang og onse ka police help desk sa rota sa prosesyon alang sa Fiesta Senor ug sa Sinulog Grand Parade.

Si Cebu City Police Office director PSSupt. Royina Garma nagkanayon nga tungod sa pagtak-op sa linya sa communication atol sa foot procession ug grand parade aduna silay ipakatap nga 11 ka help desks aron adunay dali nga kaduolan ang katawhan.

Subay niini giawhag ni Garma ang katawhan dili magmakuli sa pagduol sa mga polis ug kanunay magmatngon sa tanan nga panahon.

Samtang mopakatap sab og 28 ka medical teams ang Department of Health (DOH-7) sa ipahigayon nga foot procession ug madungagan pa kini og di momenos 35 ka teams sa grand parade.

Si Dr. Shelbay Blanco, medical officer sa DOH-7 nagkanayon nga niadtong Enero 7 nagpahigayon sila og coordinative meeting sa tanang Emergency Medical Services (EMS) teams ug gituki nila kabahin sa foot procession ug grand parade.

Matud ni Blanco nga nakig-coordinate usab sila sa Cebu Medical Society ug karong semanaha nagpahigayon gihapon sila og series of coordinative meetings alang sa preparasyon sa naasoy nga mga kalihukan.

Panahon sa foot procession, gikan ang medical teams sa DOH hospitals, private hospitals ug non-government organizations (NGO) sama sa Philippine Red Cross ug Emergency Rescue Unit Foundation (ERUF).

Aduna kini lima ka sektor ug gi-divide sa lima ka staging areas ug kada sektor adunay medical teams nga gilangkuban sa unom ka miyembro, adunay doctor, senior nurses nga adunay mga tambal ug medical apparatus ug radio communicator.

Gasa sa pagpangan-dam sa medical teams, andam na usab ang hospitals diin ang Cebu City Medical Center (CCMC) ang padulngan sa minor cases ug sa Vicente Sotto Memorial Medical Center (VSMMC) alang sa major cases. Apan depende gihapon sa pagbuot sa pasyente kon magpa-admit kini sa pribado nga ospital.

Dugang ni Blanco nga kasagaran sa mga pasyente sa miaging tuig mao ang mga nakuyapan, nitaas ang blood pressure ug niubos ang blood sugar.

Giabisohan sa doctor kadtong mga adunay gipamati sa lawas nga magpundo nalang sa ilang panimalay apan kun gusto gyud gani nga mosalmot, kon mahimo, motumar nalang daan og tambal.

Giawhag usab ni Blanco ang publiko nga magdala ug moinom gyud og daghang tubig aron malikayan ang dehydration ug magdala og payong, kalo ug raincoat inkaso nga mag-usab-usab ang dagan sa panahon ug magsuot og komportableng senina.  (Joevelon G. Pinay)(BANAT NEWS)