Walay fireworks ug fly zone atol sa kapistahan

CEBU, Philippines – Walay fireworks display karong tuiga alang sa kapistahan ni Sr. Sto. Niño nga ipahigayon sa Basilica Minore del Sto. Niño. Gidili usab ang pagdala og balloons ug giawhag ang katawhan sa dili pagdala og dagkong bag kon mosulod sa basilica matud ni Fr. Pacifico Nohara Jr., OSA, rector sa basilica.

Dugang ni Nohara nga sama sa miaging tuig, wala gihapoy fireworks display kay ang budget alang niini kay ilang gitabang sa mga nanginahanglan.

Sa miaging tuig ang budget alang sa fireworks, gidonar sa mga lugar nga nanginahanglan sa maong kantidad ug mao usab kini ang ilang pagabuhaton karong tuiga.

Gidili usab ang pagdala og balloons sulod sa basilica paglikay sa kadaut nga mamugna niini.

Si Fr. Aladdin Luzon, OSA, direktor sa Cluster for Safety, Security Peace and Order sa basilica nagkanayon nga kon magdala man gani og balloon adto ra kutob sa entrance ug dili kini pwede isulod.

Si Nagiel Bañacia, ang pangulo sa Cebu City Disaster Risk Reduction and Management Office (CDRRMO) nagkanayon nga sa miaging tuig nakasinati og brownout sa may Osmeña Boulevard gumikan sa nasangit nga balloon ngadto sa wire sa kuryente. 

Matud ni Bañacia nga kon nabalaka ang kadaghanan nga ma-shutdown ang signal sa cellular phones angay usab nga kabalak-an ang risgo sa balloon ilabi na nga makamugna kini og brownout.

Si Bañacia midugang nga kon panahon sa prosesyon dili lang sab magdala og balloon.

Iyang giawhag nga gidili usab ang pagdala og botelya aron malikayan nga adunay masamad ilabi na kon mabuak kini.

Nunot niini, gideklara usab ni Garma nga “no fly zone” sa siyudad alang gihapon sa seguridad sa tanan ug andam ang kapolisan mosakmit o mopasaka og kaso sa tanang makalapas sa balaud.

Gidili ang paggamit og drone, balloons o ubang gamit sa pagpalupad sa adlaw mismo sa kapistahan.

“But yong drone talaga hindi pwede o helicopter na laruan. Anything that will fly, so dyan ipinagbabawal. Huhulihin talaga namin nyan. I-confiscate talaga lahat yan at kakasuhan” dugang ni Garma.

Miasoy sab siya nga tanang kapolisan hatagan nila og radyo nga gihatag ni Presidential Assistant for the Visayas nga si Michael Dino. Nasayran nga 300 ka radyo ang anaa kanila alang sa 24/7 nga kumonikasyon ilabi na nga walay signal sa Fiesta Señor.

“May base radio na lahat stations. Mao mas clearer ang signal, and its actually more than 300 radios ang among ma-provide na” butyag pa ni Garma. (Nichole Alexis A. Abas/DILT)(BANAT NEWS)