Mga kandidato unta dili mo-epal sa Sinulog–Sarno

CEBU, Philippines — Niining nagkaduol nga kasaulogan sa Sinulog gipaabot nga daghang politiko ang mobisita sa Sugbo ug nunot niini ang Commission on Elections nipahimangno nga likayan nga mahimong “epal” sa maong kalihukan.

Gipasabot ni Cebu City North District Election Officer Marchel Sarno nga sa dili pa ang campaign period pweding makapangampaniya ang mga kandidato apan panahon sa kasaulogan sa Sinulog unta ang mga kandidato magmatngon nga dili matawag og “epal”.

Matud ni Sarno nga gikan sa Enero 13 hangtud sa Hunyo 12 mao ang election period sa national ug local election niining tuiga.

Gikan sa Pebrero 12 hangtud sa Mayo 11 mao ang campaign period sa mga senador ug party-list samtang sa Marso 29 hangtud sa Mayo 11 sa lokal.

Sa campaign period, si Sarno nagkanayon nga kinahanglan ang mga campaign posters anha ibutang sa designated areas ug regulated na usab ang paggawas nila sa advertisement sa TV ug radyo ug uban pang klase sa advertisements.

Samtang si Konsehal Dave Tumulak, executive committee chairman sa Sinulog 2019 nagkanayon nga welcome ang mga politiko sa lokal  ug national nga moapil sa Sinulog basta ang intensiyon mao ang relihiyosong kalihukan ug dili pamolitika.

Gibutyag ni Tumulak nga adunay upat ka kandidato sa pagkasenador ang nipadala og request sa kagamhanan sa siyudad nga motambong sa kalihukan.

Apan ang maong request wala pa aprobahi ni Cebu City Mayor Tomas Osmeña nga maoy overall chairman sa Sinulog committee.

Dugang ni Tumulak nga tugotan nga makasulod ang mga politiko apan dili sila tugotang makaestorya gawas lang kang Presidente Rodrigo Duterte kinsa gipadalhan sa siyudad og imbitasyon niadto pang buwan sa Disyembre sa niaging tuig apan wala pay kompirmasyon kong makatambong ba kini. (BANAT NEWS)