Daghan og bun-og ang ulo sa bata

CEBU, Philippines — Nakumpirmar sa gipahigayon nga autopsy sa patayng lawas sa 6-anyos nga batang lalaki nga taga Lungsod sa San Remigio nga grabeng pagdagmal maoy nag-unang hinungdan sa hinanaling kamatayon niini.

Si SPO3 Joe Johnnesky Ynot, imbestigador sa San Remigio Police Station miingon nga gibase nila ang resulta nga gihimo sa mga sakop sa Philippine National Police Regional Crime Laboratory nga gipagawas niadtong Domingo sa hapon.

Dugang sa polis nga ang bata nga gikatahong namatay niadtong Disyembre 30, 2018 ang gidudahang nadagmalan sa iyang inahan ang nakabaton og mga bun-og sa iyang ulo.

Gitataw ni SPO3 Ynot nga bisan kon wala pa mapagawas ang kinatibuk-ang resulta sa autopsy, ang doktor miluwat na og death certificate nga nagtumbok sa bahin sa lawas nga nakasinati og mga bun-og ilabi na sa ulo niini.

Giasoy sa polis nga inahan sa biktima, gipasakaan na og kaso nga parricide sa  Cebu Provincial Prosecutor’s Office  niadting Enero 3 ug ang finding sa autopsy maoy mopalig-og sa kaso nga ilang gipasaka.

Kahinumduman nga gidakop ang maong inahan niadtong Enero 1 human usab mitaho ang taga punerarya nga mao unta ang mo-embalsamar sa bata.

Nahimong katarungan sa inahan nga gihilantan ang bata ug namatay. Ang embalmer nga nagtan-aw sa patayng lawas sa bata daw gibati og katahap sa nakitang mga bun-og nga maoy nakaaghat sa tagdumala sa punerarya sa pagpangayog panabang sa kapolisan alang sa paghimo og pakisusi sa hinungdan sa kamatayon niini sa dili himoon ang pag-imbalsamar.

Sa pasiuna nga imbestigasyon sa kapolisan, ilang nasuta pinaagi usab sa pag tug-an sa inahan nga ang bata iyang nabunalan og gahi nga butang dihang nagdumili kini sa pag-inom og tambal alang sa gihambin niining hilanat. (BANAT NEWS)