Padayong mosuporta sa Surrender to God

CEBU, Philippines — Gipasalig sa chairman sa Duros Group of Company nga si Rafaelito “Lito” Barino nga magpadayon ang iyang ayudad ug suporta sa Surrender to God Program sa Archdiocese of Cebu ug Love of God Community nga gidumala sa chairman sa Commission on the Laity ug Executive Director sa SuGod nga si Fe Barino.

Matud ni Barino, atol sa iyang State of the Duros Address nga tungod sa nakita niyang kaayohan sa maong proyekto, magpabilin ang ilang ayuda niini isip corporate social responsibilities sa kompaniya. Dugang niya nga sukad gisugdan ang maong proyekto, ang ilang kompaniya nakaayuda na og P5 milyones.

Giawhag sa chairman sa Duros nga iyang mga ginsakopan magpabilin gihapon sa ilang trabaho ug negosyo aron padayon gihapon ug dili mohunong ang paghatag nila og ayuda ilabi na sa mga nanginahanglan.

Si Famela Mantuhac, ang administrative staff sa SuGod program mapasalamaton sa ayuda nga gihatag sa Duros kay daku kini og tabang sa maong proyekto ilabi na daghan ang mga miapil niini.

Gitug-an niya nga gawas sa SuGod program diha sa komunidad, aduna na usab silay programa sulod sa prisohan ilabi na kadtong mikuha sa plea bargaining agreement. (BANAT NEWS)