Laing sunog miigo sa Duljo

CEBU, Philippines — Katorse ka mga panimalay ang hingpit nga naugdaw atol sa pag-ulbo sa sunog kagabii diha sa may C. Padilla Street, Barangay Duljo-Fatima sa Dakbayan sa Sugbo. Samtang nigawas sa imbestigasyon nga tinuyo ang nahitabong sunog nga unang niigo sa mao gihapong barangay niadtong Disyembre 25 sa kaadlawon sumala pa sa kadagkoan sa kabomberohan sa siyudad.

Ang sunog gituohan nagsugod sa panimalay Benjamin Lopez matud pa ni Cebu City Fire Marshall Chief Inspector Noel Nelson Ababon nga nahinabi sa Banat  News.

Ang sunog nadawat sa kabomberohan alas 6:11 sa gabii ug giisa dayon ngadto sa third alarm alas 6:20 tungod sa tungod sa kasikit-sikit sa kabalayan. Hingpit kining nakontrolar alas 6:57 na sa gabii.

Sumala pa ni Ababon gawas sa onse ka balay nga hingpit naugdaw aduna say tulo ka balay nga nakan-an sa kalayo ug gibanabanang mokabat tunga sa milyon ka pesos ang danyos sa maong sunog. Wala sila maglisod  kay daplin lang sa dalan ang mga balay nga nasunog apan nasagmuyo sila sa mga tawo nga nagmagahi pagpadaplin aron makaagi ang mga bombero.

Gibutyag ni Ababon nakasinati sila og gamay nga problema sa mga linya sa kuryente tungod kay dugay kining napawong sa Visayan Electric Company (VECO) kay risgo kaayo para sa mga bombero  ug sa mga tawo sa lugar ang mga nagkutay nga mga wires nga nasunog.

Samtang si Tata Lopez, nitug-an nga nakapanimaho sila ug aso hinungdan ilaha kini gipangita ug sa paggawas niya sa balay baga na kaayo ang aso hinungdan gisiguro niya pagpagawas iyang tulo ka anak.

Gitug-an ni Lopez, diyes minutos gikan sa pagkatimaho niya sa aso nisunod gilayon ang dako nga kalayo apan wala siya masayod kun diin kini nagsugod. Atol ning pagsuwat sa balita, walay natala nga mga nakalas o nangaangol sa maong hitabo apan may gipangita nga batan-ong lalaki. Samtang gipaabot nga ipahiluna sa barangay ang mga nasunogan.

Sa pikas bahin, gitug-an ni Ababon nga karong adlaw nga Lunes mopasaka sila og kaso batok sa suspetsadong nagsugod sa sunog nga niigo sa maong gihapong barangay niadtong Disyembre 25 sa kaadlawon sa miaging tuig. Ang maong sunog niugdaw  sa kabalayan sa kapin 500 ka mga pamilya gikan sa unom ka mga sitio ug nikalas og usa ka tiguwang ug usa ka bata.

Dugang pa ni Ababon, base sa ilang imbestigasyon ug pamahayag gikan sa mga saksi, nasayran nga gituyo og sunog ni Rene Boy Aguanta ang motor niini diha sa sud sa ilang sala nga daling mikatap sa kabalayan. Niadtong Disyembre 26 pagkasunod adlaw ang konseho sa barangay pinangulohan sa ilang barangay kapitan nga si Elmer Abella nideklarar og state of calamity aron matabangan ang mga nasunogan gikan sa sitio Buli, Ponyang, Mansanitas, Catwalk, Plastikan, Pasong Kabayo ug San Pedro. Kagahapong adlawa mao usab ang sumad sa pagkasunog sa Metro Ayala Department Store. (Joevelon Pinay/IBM)(BANATNEWS)