10-anyos gidunggab sa papa
CEBU, Philippines – Usa ka amahan nga giingong may kakulian sa pangisip ang gidakop human niini gidunggab ang 10-anyos niyang anak nga babaye diha sa Sitio Palwa Maria, Barangay Inayawan sa Dakbayan sa Sugbo kagahapon sa buntag.
Ang 43-anyos nga suspetsado kinsa giingong magsuol-suol ang sakit sa pangisip gikatahong naabtan gyud sa tulo ka mga nirespondeng tanod nga gisabak niini ang biktima ug gipunayan og tion og kutsilyo. Wala pangalani sa Banat News ang suspek aron panalipdan ang bata.
Matud pa nga gitabangan og layog sa mga tanod ang suspek hangtud nga nadis-armahan sa siyam ka pulgadas nga kutsilyo ug dayon ilang nasalbar ang bata kinsa nakaangkon og samad dinunggaban sa walang bahin sa dughan.
Ang bata gidala na sa tambalanan ug padayon nga giobserbahan. Matud pa ni Chief Inspector Regino Maramag nga nagsige pa og hangyo ang bata nga “Ayaw Pa” dihang naabtan sa mga tanod.
"Mag wait pa ta sa complainant kay usually pag immediate family ang biktima at ang suspect hindi nagpa-file ng kaso,”matud ni Maramag kinsa midugang nga dunay history sa nervous breakdown ang suspek base sa impormasyon gikan sa mga nakaila niini.(/IBM)(BANAT NEWS)
- Latest
