Gica giingong mokanaog isip mayor sa Dumanjug

CEBU, Philippines — Ang mayor sa Lungsod sa Dumanjug Efren Guntrano Gica giingong motuman sa kamanduan sa Department of Interior and Local Government (DILG) nga mobakante sa iyang pwesto isip mayor sa lungsod.

Si Gobernador Hilario Davide, III nibutyag nga iyang nahinabi si Gica kagahapon atol sa pagbisita niini diha sa iyang buhatan ug ang mayor giingong nibutyag nga mosunod sa kamanduan sa DILG.

Ang provincial director sa DILG Jerome Gonzales ni-serve sa memorandum gikan sa DILG central office nga nagmando kang Gica nga mohawa sa pwesto ug ipuli ang bise mayor niini nga si Rene Asentista.

Ang Office of the Ombudsman nikonbikto kang Gica sa kasong dishonesty ug grave misconduct niadtong Pebrero 2017 tungod sa giingong pagpaburot niini sa resibo sa usa ka restaurant niadtong tuig 2014.

Apan ang decision sa Ombudsman gi-reverse kini sa Court of Appeals tungod sa Aguinaldo doctrine nga usa ka legal principle nga ang usa ka opisyal sa gobiyerno maabswelto sa kaso niining administratiba kon mapili balik atol sa election.

Si Gica subling napili isip mayor sa lungsod sa ikaduhang  termino niadtong 2016 election.

Sa laing bahin, si Davide nipasangil nga pamolitika ang pagpasaka ni Kongresista Gwendolyn Garcia og kaso ngadto sa Ombudsman batok kaniya ug sa ubang opisyal sa Kapitolyo.

Si Davide nihimakak sa pasangil ni Garcia nga giingong ilegal ang pagtudlo niini sa mga department head.  BDB (BANAT NEWS)