Reblocking gihuwat sa mga nasunugan

CEBU, Philippines — Giawhag ni Duljo-Fatima Barangay Councilor Guian Godofredo ang kagamhanan sa Siyudad sa Sugbo nga makig-alayon na sa barangay aron mahibaw-an kun kanus-a himoon ang clearing ug reblocking sa mga dapit nga naigo sa dakong sunog niadtong Disyembre 25, 2018.

Matud ni Konsehal Godofredo kinsa mao sab ang tsirman sa social services sa barangay nga sagad sa mga biktima sa sunog ganahan nga masugdan na ang reblocking ug clearing sa daling panahon aron nga makatukod na sila og balik sa ilang mga panimalay.

Dihang gibisita sa konsehal ang lugar nga nasunog niadtong Martes sa gabii, nakita niini nga ang mga nasunugan anaa ra naghigda sa naugdaw nila nga balay, gani iya man kining gipahimangnuan nga magbantay kay delikado ilabi na nga ngitngit sab ang dapit.Ang gipasabot niya nga reblocking mao ang pagpalapad sa dalan aron kaagian kini og mga sakyanan ilabi na kon adunay mga mahitabong emerhensiya.

Kun adunay mga uyon sa reblocking duna say mipadayag sa iyang pagsupak sa maong plano.

Ang operations head sa Division for the Welfare of the Urban Poor nga si Genevieve Alcoseba miingon nga mopahigayon sila og consultative meeting sa alas singko sa hapon aron hisgutan ang reblocking ug adto kini ipahigayon sa gym sa San Nicolas Elementary School.

Midugang sab kini nga karong adlawa ang ilang technical team magsukod sa boundary sa nasunugan.

“To identify pud the ownerships kay naa naman gud mga titled lots diha”, asoy ni Alcoseba.

Sa kasamtangan ang mga biktima sa sunog anaa karon gipahiluna sa Duljo-Fatima Barangay Hall ug sa San Nicolas Elementary School.

Samtang matud ni Godofredo nga tukion pa nila sa Barangay Council kun unsay paliton nila gikan sa calamity fund aron maoy ihatag ngadto sa mga biktima sa sunog.

Ang barangay adunay P675 mil nga calamity funds apan P205 mil lang niini ang mahimong magamit.

“The rest para to siya sa preparedness, mga prevention”, pasabot ni Godofredo.

Sa pagkakaron ang mga gikinahanglan sa mga biktima sa sunog mao ang mga hygiene kits, pagkaon, housing materials ug uban pa.

Hinoon asoy ni Godofredo nga ang National Housing Authority misaad nga mohatag og assistance sa barangay, depende kon cash assistance ba o housing materials. (/DILT)(BANATNEWS)