Nahitabo sa Negros gikondenar
CEBU, Philippines — Gisugat og lihok protesta sa militanteng grupo nga Bagong Alyansang Makabayan (BAYAN) Central Visayas ang bag-ong tuig. Nagmartsa gikan sa eskina sa Osmeña Boulevard ug dalan P. Del Rosario paingon sa buhatan sa Police Regional Office (PRO-7) ang di mo menus sa 30 ka miyembro sa naasoy nga grupo. Gipanguluhan ang mga nagprotesta ni Jaime Paglinawan, tsirman sa BAYAN Central Visayas.
Ilang gipalanog ang mga reklamo batok sa administrasyon ni Presidente Rodrigo Duterte ug mikuwestiyon sa legalidad sa gilusad nga mga operasyon sa Philippine National Police (PNP).
Si Paglinawan nagkanayon nga ilang gikondenar ang gihimo karon sa Presidente ug sa kapolisan nga giingong pag-operate og De Facto Martial Law ug Marcosian Bloody Campaign. Gitumbok niya ang nahitabo sa Negros Oriental diin unom ka tawo ang namatay ug 31 ang gipangdakop sa subsob nga operasyon sa kapolisan niadtong Disyembre 27 sa miaging tuig.
Kahinumduman nga napatay sila si Reneboy Fat, Jaime Revilla, Dondon Isugan, Jun Cubul, Demetrio Fat, mga residente sa Siyudad sa Guihulngan ug Constancio Languita sa Lungsod sa Sta. Catalina. Ang mga biktima gikatahong puros mag-uuma ug giingong nanukol dihang gipangdakop kini.
Una nang gipahibawo sa kapolisan nga lehitimo ang maong operasyon apan si Paglinawan miinsistir nga ang maong operasyon kuwestiyonable ug sama kini sa Oplan Tokhang.
Gikondenar usab sa maong grupo ang nadawat nga hulga sa kinabuhi sa mga lider sa Bohol ug red tagging sa mga lider sa Cebu ingon man ang bukas nga kampanya sa Presidente batok sa grupo.
Gikatakda nga mosugod sila og lawom sa pakisusi pinaagi sa pag-umol og fact-finding committee sa nahitabo sa Negros Island.
Gitapos pinaagi sa usa ka noise barrage ang rally kagahapon diin tuyo nila nga matawag ang atensiyon ug mapadungog ang ilahang mga yangungo ngadto sa kapolisan. (/DILT)(BANATNEWS)
- Latest
