Programa sa BFP sayong giimplementar paglikay sa sunog

CEBU, Philippines — Malinawon ug walay natala nga firecracker-related nga sunog sa pasko ug sa pagsugat sa bag-ong tuig sa Dakbayan sa Sugbo matud ni Cebu City Fire Marshal Chief Inspector Noel Nelson Ababon.

Si Ababon nagkanayon nga gisugdan na nila pag-implementar ang “Oplan Ligtas na Pamayanan” sa nilabay’ng pasko ug bag-ong tuig bisan pa nga ang ilahang headquarter nihatag og instructions nga karon pa nga tuig ipa-implementar kini.

Matud ni Ababon nga iyahang gipangusgan ug gi-required ang mga sub-station nga mosulod gyud sa mga barangay aron pagpahinumdom sa mga residente ug nanghatag sila og mga leaflets.

Base sa report nga ang tibuok nasud epektibo kini sa fire prevention activities sa mga establisamento apan  medyo kulang sa mga komunidad diin ang mga insidente sa sunog  kasagaran mahitabo diha sa mga komunidad.

Nunot niini, ang City Fire Department nigama og mga lakang nga malikayan ang susamang sunog nga nahitabo sa niaging pasko diha sa Barangay Duljo Fatima.

Gisusi ni Ababon ang mga fire hydrants aron mahibaw-an kon asa nga hydrant ang kusog ug hinay ang pressure sa tubig.

Nagpahigayon usab sila og fire drill dili alang sa mga establisamento ug mga sitio diin tumong niini aron maapil sa ilang hazard mapping kalabutan sa ilahang programa nga Oplan Ligtas na Pamayanan aron usab masuta ang posibleng mamahimong evacuation area.

Si Ababon nidugang nga kong mahimo na ang mapa ibutang kini sa mga barangay hall ug sa mga fire station ug station sa mga barangay nga anaay fire brigade. (/BDB)(BANATNEWS)

Mga pabuto gisakmit sa kapolisan sa Mandaue ug Lapu-Lapu

Romeo T. Limpangog

CEBU, Philippines — Bisan sa mga pagpahibalo sa kapolisan nga higpit nga gidili sa kagamhanan sa Dakbayan sa Mandaue ang pagpamaligya og mga pabuto apan adunay mga nagtagotago og pamaligya diin pipila niini ang nasakmit sa nagpatrolya nga kapolisan,

Si  Chief  Inspector  Aldrin Villacampa, hepe sa Presinto 1  sa Mandaue  City Police Office nibutyag nga nikabat sa P10,000 ang kantidad sa nagkadaiyang matang sa mga pabuto ang ilang nasakmit  nga gibaligya diha sa Barangay Centro sa wala pa ang tungang gabii sa pagsugat sa bag-ong  tuig.

Samtang si Police Officer 3   Angelo Arnais nibutyag nga gawas nga gidili ang pagpamaligya og pabuto sa kagamhanan sa dakbayan ilahang namatikdan nga gidili usab ang maong matang sa mga pabuto nga ilang nasakmit. Naglakip sa mga pabuto nga ilang nasakmit mao ang kwetis, whistle bomb, Judas belt, Piculo, supper ug Goodbye Philippines. Sa laing bahin, ang mga naninda og pabuto sa Dakbayan sa Lapu-Lapu nga maoy giila nga tiggama niini ang mireklamo usab sa hinay kaayo ang halin sa gibaligya nilang mga pabuto.

Si Lapu-Lapu City Mayor Paz Radaza nagkanayon nga ang 98 ka namaligya og pabuto sa dakbayan nga nakalukat og business permit nga iyang napirmahan maoy labing ubos  nga gidaghanon  itandi sa niaging tuig 2017 nga kapin sa 100.

Ang mga manindahay og pabuto gitugotan sila sa pagpamaligya diha sa pinili lang nga  barangay nga giila nga firecracker zone area apan namatikdan sa kapolisan nga adunay pipila ang wala na mosubay sa gitugot nga gidak-on  sa pabuto nga ilang gipamaligya hinungdan nga gisakmit  kini sa pagsiguro nga dili magamit sa pagpabuto sa pagsugat sa tungang gabii sa bag-ong tuig. (/BDB)(BANATNEWS)