Gamay ra ang mangapil sa Sinulog 2019

CEBU, Philippines — Pipila ka mga kanunay nga modaug sa Sinulog Grand Parade ang dili una moapil sa kompetisyon karong tuiga human nga gamay ra nga mga contigents ang mipadayag sa ilang intensiyon nga moapil sa Sinulog Festival karong umaabot Enero 20.

Si Konsehal Dave Tumulak, executive committee chairman sa Sinulog Foundation Inc. (SFI) miingon nga 24 lang ka contingents ang moapil sa Sinulog Grand Parade sunod tuig, diin menus kini kon itandi sa miaging tuig nga miabot og 30.

“Expected na siya kay naa may upcoming local election so ang mga funds sa mga LGUs ila gyud gihurot ba for preparation next year”, butyag ni Tumulak.

Bisan paman og wala ang mga crowd favorites, ang duha ka champion sa Free Interpretation ug Sinulog Based categories, modepensa lang gihapon sa ilang titulo, kini mao ang Lungsod sa Daanbantayan ug Carcar City.

Pipila sa mga kanunay nga modaug nga dili moapil sa kompetisyon mao ang Tribu Katbalaugan sa Catbalogan City; Kulturang Panglaoanon sa Panglao, Bohol; Tribu Buyoganon sa Abuyog Leyte; ug Provincial Government sa North Cotaboto Kalivungan Festival.

Matud ni Tumulak ang out-of town contingents nga moapil sa Sinulog Grand Parade mao ang Tangub City, Misamis Occidental, Placer Masbate ug Murcia, Negros Occidental.

Sa mga contigents sa lalawigan mao ang Daanbantayan, Carcar City, Ginatilan, Toledo City, Bogo City ug Talisay City.

Ang mga contingents sa Sinulog sa Barangay sa Dakbayan gilangkuban sa katorse ka barangay nga mao ang Sapangdaku, San Nicolas Proper, Mambaling, Talamban, Basak San Nicolas, Mabolo, Suba, Sawang Calero, Cambinocot, Cogon Pardo, Inayawan, Bulacao, Labangon ug Guadalupe.

Ang maong mga contigents makadawat og P200 mil nga subsidy gikan sa SFI alang sa Sinulog sa Barangay sa Dakbayan competition ug laing P200 mil kon mo-presentar gihapon sila sa Grand Parade.

Kay 24 lang ang contingents sa Sinulog Grand Parade 2019, ang organizers nagtinguha nga matapos ang kalihukan sa alas singko sa hapon.

Bisan paman og menus ang contingents, si Tumulak miingon nga dili kini makaapekto ug grandioso lang gihapon ang Sinulog Festival sama sa naandan.

“Ang choreography mausab karong tuiga kay ato naman gimenusan ang percentage sa props so more on dance interpretation and devotion to Sr. Sto. Niño”, asoy sa konsehal. (/DILT)(BANATNEWS)