Pabuto nga ‘dalogdog’ nasakmit

CEBU, Philippines — Mga pabuto nga peligro kun mobuto sa mga kamot sa naggamit niini gipangsakmit sa kapolisan sa Dakbayan sa Lapu-Lapu diha sa mga nagkalain-laing mga tindahan sa Barangay Babag kagahapong adlawa.

Ang mga sakop sa City Intelligence Branch pinangulohan ni Supt. Mark Gifter Sucalit mipahigayon sa maong operasyon human nakadawat og impormasyon nga adunay mga namaligya og gidili nga matang sa pabuto sa maong dapit.

Atol sa pagronda, nasakmit sa kapolisan ang 194 pcs.dagkong"Pop- pop";  29 pcs. small size "Pop- pop"; 28 pcs small size "Dalogdog"; 31 pcs. medium size "Dalogdog";  ug usa ka large size "Dalogdog."

Ang maong mga pabuto gidili tungod sa kakusog sa pagbuto niini ug peligro kaayong makaangol o makapatay og tawo.

Ang Barangay Babag maoy karaang dapit diin adunay mga pabrika sa pabuto ug anha usab mapalit ang mga pabuto panahon sa kapaskohan.

Tungod kay nahimo naman kini panginabuhian sa uban, gitugot gihapon ang paghimo ug pagbaligya niini diha lamang sa maong barangay apan giestrikto kay kinahanglang may permiso gikan sa kapolisan, kabomberohan ug sa siyudad.

Pakyas hinuon ang kapolisan pagdakop sa mga vendors nga namaligya niini sanglit nakabantay sila sa pag-abot sa mga polis ug daling nangikyas biniyaan ang ilang mga gipamaligya.

Ang mga nasakmit nga pabuto gibanabanang mokantidad og P5,600 gidala na sa ilang buhatan ug gikatakdang basaon og tubig aron di na kini magamit pa. (BANAT NEWS)