Barangay I.D. system sa Barangay Zapatera

CEBU, Philippines — Ipatuman sa unang higayon ang Barangay I.D. System sa Barangay Zapatera nga gipasiugdahan ni Kapitan Francisco "Frank" Benedicto sugod karong buwan sa Enero.

Matud ni Kapitan Benedicto ang maong proyekto gipalig-on pinaagi sa pagpasar og barangay resolution aron sa paghatag og kahigayonan sa mga residente sa ilang barangay nga makabaton og I.D. nga mahimo nilang magamit sa bisan unsa nga government transaction.

Dugang ni Benedicto, ang maong I.D. system magpamatuod sa usa ka residente nga lumad siya sa maong lugar ug botante usab.

Gitug-an sa kapitan nga ang maong I.D. dili magsilbing barangay clearance kay gihimo kini isip pagtabang sa mga residente nga walay balido nga identification card. Si Benedicto mipadayag usab nga dili pinugsanay ang maong I.D. system. Alang lang kini sa buot makabaton ilabi na sa mga walay I.D. nga nagpangidaron og 18-anyos pataas.

Sa tibuok Dakbayan sa Sugbo nga adunay 80 ka barangay ang Brgy. Zapatera mao ang labing unang barangay nga mopatuman niining I.D system. (BANAT NEWS)