Kutob karon ang pagbayad sa buhis
CEBU, Philippines — Nanawagan ang Cebu City Treasurer’s Office sa tanang real property owners sa siyudad sa pagbayad sa ilang mga buhis karong tuiga kutob karong adlawa, Diyembre 31.
Bisan og wala untay trabaho, matud ni Acting City Treasurer Arlene Rentuza nga ablihan nila ang ilang buhatan karong adlawa aron ma-accommodate ang gustong mamayad sa ilang real property tax (RPT).
“We want to avoid nga ang collection would be officially received or credited to the bank on January 3. Atong system, ang official receipt nga issue is December 31 unya kon January 3, mo-generate na og penalties and surcharges,” matud niya.
Karong tuiga, gitumong sa dakbayan ang P1 billion collection gikan sa RPT. Gikan niadtong Enero hangtud Nobyimbre, ang City Treasurer’s Office nakakolekta na og P998.7 million.
Positibo si Rentuza nga makab-ot nila ang P1 billion nga target karong tuiga.
Gipasidad-an niya ang mga mamayad nga tanan unta mobayad og cash o manager’s check.
“Dili nami modawat og personal or corporation check kay iagi pa na og clearing. By the time nga we deposit sa bangko, ang clearing ana is January 3 so mahog gihapon nga bayad sila sa surcharge,” sigon niya.
Gibutyag ni Rentuza nga modawat sab ang siyudad og bayad sa mga gustong mag advance payment sa ilang RPT sunod tuig nga adunay 10 percent discount sa tibuok nilang bayranan. Bukas ang ilang opisina karong adlawa gikan alas otso sa buntag hangtud alas singko sa hapon. (BANAT NEWS)
- Latest
