Kaugmaran sa Patria sabotan

CEBU, Philippines — Ang Cebu Land Master, Architect Melva Java ug heritage consultant ang magtagbo karong adlawa sa alas 10:00 sa buntag diha sulod sa Archbishop Palace diin tukion nila ang kabahin sa kaugmaran sa Patria de Cebu.

Kini ang gibutyag ni Cebu Archbishop Jose Palma kinsa nahinabi sa Banat News.

Matud ni Palma nga mag-final meeting sila  aron tukion ug sabotan sa matag habig ang kabahin sa kaugmaran sa Patria.

Si Palma nagkanayon nga siya usa ka architect ug adunay mga bag-o nga data nga gihatag si Java hinungdan nga iyahang giawhag ang matag habig nga tukion kini nila karon atol sa ilang tigom alang sa umaabot na nga construction. Si Palma malaumon nga human sa maong tigom makapagawas na ang matag habig sa ilang mga kagustohan sa angayan nga ipabilin nga parti sa Patria de Cebu.

Ang maong tigom nahimo human nga daghan ang nipadangat sa ilang pagsupak sa pagguba sa hingpit sa Patria alang sa bag-ong building niini tungod kay kabahin kini sa kasaysayan sa Sugbo. (/BDB)(BANATNEWS)