Pagsusi sa mga patigayon magpadayon

CEBU, Philippines — Magpadayon ang Cebu City Task Force on the Inspection and Investigation of Business Permits (TFIIBP) sa pagsusi sa mga business establishments sa siyudad sunod tuig. Kini human si Mayor Tomas Osmeña mihatag kanila og pagtugot nga magpadayon sa ilang operasyon pinaagi sa random nga pagbisita sa mga firms sa dakbayan.

“Of course, I’ve been asking that for two years. No (dili satisfied), this new task force it’s moving but I’m not satisfied”, asoy ni Osmeña.

Matapos na unta ang term of service sa TFIIBP karong buwana apan gumikan sa maong kamanduan sa mayor mohimo gihapon sila sa ilang trabaho.

Ang task force giumol aron mosusi sa mga business establishments nga makatabang sa Business Permits and Licensing Office (BPLO) sa paggukod niadtong mga milapas sa revised omnibus tax ordinance ug ubang existing laws. Unang miingon si Osmeña nga gukdon sa kagamhanan kadtong mga establisemento nga wala magbayad og buhis ug kadtong pakyas nga makakuha og permit sa City Government.

Si Melvin Bacalso pangulo sa Task Force miingon nga motuman sila sa kamanduan sa mayor.

Sukad niadtong Agosto, 70 porsiyento na ka mga business establishments ang ilang nasusi sa 80 ka barangay sa siyudad diin sa kinatibuk-an moabot sa 12,545 kini ka business establishments.

Diin ang 4,115 niini ang nakadawat og show cause order gikan sa City Legal Office ug sa 4,115 adunay 1,185 ka mga business owners ang wala nagbayad og buhis ug 2,930 ang pakyas nga makaproseso ug pagkuha og business permits.

Apan ubos kini sa ilang target accomplishments nga 30,000 diin usa sa rason mao ang kakuwang og tawo.

Nasayran nga ang maong Task Force duna ray 18 ka tawo nga mosusi ug moimbestigar sa mga firms sa kabarangayan.

Nunot niini si Bacalso mo-request og dugang tawo ug nanghinaot nga mosugot ang mayor sa iyang hangyo.

Apan sa ilang operasyon sunod tuig mo-resume human sa one-stop Mayor’s Business Permit renewal sa Robinsons Galleria Cebu kay ang iyang mga tawo gamiton man alang niini.

Ang schedule sa business permit renewal magsugod sa Enero 4 hangtod na sa petsa 25. (/DILT)(BANATNEWS)