Dalaga patay nang nakit-an sa kalibunan

CEBU, Philippines — Patay nang nakit-an ang usa ka 18-anyos nga babaye nga wala nay sapot ang ubos nga bahin sa iyang lawas sa bukiran nga lugar sa Sitio Sangi, Barangay Guadalupe. Siyudad sa Carcar alas dies sa buntag niadtong Martes, Adlaw sa Pasko.

Ang biktima giila sa mga awtoridad nga si Rubelyn Trinidad, 18-anyos, taga Brgy. Buloc-Buloc sa Lungsod sa Barili.

Matud ni PO3 Ramil Baroman, desk officer sa Carcar City Police Station, adunay midangop sa ilang buhatan ug miasoy nga adunay babaye nga nakit-an nga patay na sa mingaw nga lugar sa naasoy nga barangay, walay sapot ang ubos nga bahin sa lawas niini ug gituohang gilugos.

Daling miresponde ang kapolisan ug sumala pa ni Baroman nga sa ilang pagsusi, walay nakaila sa biktima. Nailhan nalang kini dihang miadto ang igsuon niini sa punerarya aron mosusi sa patayng lawas.

Ang kapolisan sa Carcar padayon pa karong misubay sa mga dapit nga posibleng giagian sa biktima ug kun kinsa kauban niini aron masuta kun didto ba kini gipatay sa lugar o igo lang kini gilabay.

Nunot niini, padayon usab nga gihimo ang hot pursuit operations batok sa posibleng nagpatay ug nag-among-among sa biktima.

Si Cebu Provincial Police Office director Police Senior Supt. Manuel Abrugena, mimando sa hepe sa kapolisan sa Carcar nga ipadayon ang paghimo og imbestigasyon ug makig-alayon sa pamilya sa biktima alang sa mas lawom nga pakisusi.

Gimando usab niini nga makig-alayon ang kapolisan sa barangay kapitan sa lugar ug nanawagan sila sa katawhan nga nahibawo sa maong krimen nga makig-alayon sa kapolisan aron makatabang sa kasulbaran sa kaso. (/DILT)(BANATNEWS)