P18B nga proyekto diha sa Kawit Island sugdan sunod tuig

CEBU, Philippines — Sugdan na sa Universal Hotels and Resorts, Inc. ang pagtukod sa P18 bilyones nga integrated resorts and casino diha sa siyam ka ektaryang luna sa Kawit Island sa South Road Properties karong tuig 2019. Ang phase 1 sa proyekto naglangkub sa usa ka convention center, shopping center, casino, themed park, ug usa ka hotel ug giingong mahuman kini sulod sa tulo ka tuig.

Ang phase 2 mao ang duha ka additional nga hotel nga itukod human sa phase 1 diin giingong mao kini ang nasabutan sa usa ka meeting niadtong niaging  semana.

Si Francisco Fernandez, executive assistant to the mayor  kinsa nitambong sa meeting nagkanayon nga magsugod ang piling works sa kataposang semana sa buwan sa Enero o unang semana sa buwan sa Pebrero sa sunod tuig.

Matud ni Fernandez nga ang UHRI mokuha og demolition permit sa siyudad ug approval gikan sa Commission on Audit una pa sila magsugod sa pagtrabaho sa maong proyekto.

Ang duha ka building nga apektado mao ang senior citizen building ug Sugbu building tungod kay anaa kini sa Kawit Island mahimutang.

Ang UHRI maoy mogasto sa pagtukod og replication nga building sa mga apektadong opisina diha sa Magellan’s Park duol sa Cebu City Hall.

Gipaniguro ni Fernandez nga walay serbisyo nga apektado tungod sa pag-demolish sa maong mga buildings sa SRP. (/BDB)(BANATNEWS)