Gipatay sa riding-in-tandem

CEBU, Philippines — Patay ang usa ka lalaki nga nagbarog sa dalan samtang kini nanigarilyo human kini gipusil sa wala mailhing mamumuno nga nagsakay og motor sa may CD Seno Street, Barangay Tipolo Mandaue City, niadtong Sabado sa gabii. Ang nakalas naila nga si Chad Christian Noval, taga Barangay Alang-alang  Mandaue City.

Base sa initial nga imbestigasyon sa kapulisan gikan sa saksi gipusil ang biktima sa makadaghan nga higayon ug daling nangikyas ang mga lalaki palayo sa lugar. Gidala dayon ang biktima sa Mandaue City District Hospital apan gideklarar kini nga patay na.

Samtang kagahapon sa hapon, giila sa mga tagtungod ang lalaki nga nakit-ang patay na diha sa kasagbutan sa Barangay Sabang, Lungsod sa Sibonga niadtong Biyernes sa gabii. Ang nakalas nga nakit-an adunay samad binunalan sa ulo giila sa inahan ug igsuon niini nga kini mao si Anecito Quinto, 39, kinsa adunay kakulian sa pangisip.

Matud pa ni Police Officer 3 Eduardo Semilla, Desk Officer sa Sibonga Police Station nidangop sa ilang buhatan ang inahan ug igsuon sa gipatay ug personal kining niila nga ilaha kining sakop sa banay.

Gisusi pa sa kapolisan kun kinsa ang nipatay sa biktima ug gidudahan nga naalaan kini nga kawatan kay mingaw man ang lugar o kaha napareglahan.

Ang mga tagtungod nitug-an nga maglakaw-lakaw pirme si Quinto nga way direksyon.( Romeo Limpangog/IBM)(BANATNEWS)