Nisuway og ikyas, “hitman” napusilan sa sampot
CEBU, Philippines – Maayong pagkababha sa sampot sa usa ka gipasanginlang durugista kinsa napusilan atol sa buy bust operation human kini miaksyon og ikyas gikan sa mga operatiba nga modakop kaniya diha sa Barangay Apas, Dakbayan sa Sugbo kagahapon sa kaadlawon.
Ang suspetsado giila sa kapolisan nga si Arwin Cabriana Tapales, residente sa Sto. Niño, Inayagan, Dakbayan sa Naga apan nagsige og burdo sa maong dapit.
Nakuhaan ang suspek og usa ka bulto ug siyam ka mga pakete sa gidudahang shabu. Na-recover sab sa kapolisan ang kalibre .9mm nga armas gikan kaniya.
Sumala sa hepe sa Mabolo Police station nga si Chief Inspector Dindo Juanito Alaras nga atol sa pagpahigayon og buy bust operation batok kang Tapales nakamatikod dayon kini nga polis ang iyang ka transaksyon.
“Ang iyang gibuhat, iyang gitukmod ang atong poseur buyer unya nisakay sa iyang motor unya gigukod sa back up nato. Gidikitan gyud nato, pagbunot niya, giunhan sa atong personnel og pusil,” dugang niini.
Atol sa ginukdanay, giingong planong pusilon sa polis ang ligid sa maong motorsiklo apan sa lubot hinuon kini naigo. Dihang samdan na, nawagtangan og kontrol ang suspek ug nabangga kini sa center island sa maong lugar hinungdan nga nadakpan kini sa kapolisan.
Gidala sa tambalanan ang maong suspetsado ug luwas na ang kahimtang. Butyag sa hepe nga nakakuha sila og impormasyon kabahin sa kalambigitan ni Tapales gikan ra sab sa mga unang dinakpan sa drogas.
“Allegedly involved ni siya sa ilegal drugs and the same time naay information nga hired killer ni siya,” butyag ni Alaras. Giingong hitman kini sa usa ka dakong drug group sa Sugbo. Kasong tigpayuhot og illegal nga drugas, paghupot og ilegal nga armas ug resisting arrest ang ipasaka batok ni Tapales. (/IBM)(BANAT NEWS)
- Latest
