Daghang maapektahan

CEBU, Philippines – Giawhag ni Gobernador Hilario Davide III ang Kongreso nga mohimo og lakang kalabot sa pag-regulate sa mga habalhabal drivers ug kining Angkas nga usa ka motorcycle ride-sharing application tibuok nasud.

Nasayran nga ang Supreme Court (SC) temporaryong mipahunong sa operasyon sa Angkas hinungdan nga ang Land Transportation Franchising and Regulatory Board (LTFRB) mimando sa mga law enforcers nga dakpon ang mga driver sa Angkas nga padayon gihapon sa operasyon ug gani ipa-impound ang mga motor.

“Congress should do something about it. To legalize or regulate kining Angkas or habalhabal, there’s got to be a law” matud ni Davide.

Ang gobernador nagkanayon nga sa balaud, wala gyud gitugot ang mga motor nga himoong pampasaheroan. Apan nakasabot usab siya nga daghan ang dili makapalit og kaugalingong sakyanan.

Ang LTFRB una nang misuspenso sa operasyon sa Angkas niadtong Nobyimbre 2017 tungod sa paglapas niini sa Republic Act No. 4136 o ang Land Transportation and Traffic Code diin gisaysay nga ang mga pribadong motorsiklo gidili sa pamasahero.

Niadtong Agosto 20 ang Mandaluyong City Regional Trial Court miisyu og preliminary injunction sa Angkas, pagpahunong sa gobyerno nga babagan ang operasyon sa maong motorcycle ride-sharing app. Ang LTFRB mi-apelar sa korte diin ang SC miisyu og temporary restraining order (TRO) sa nahimong desisyon sa Mandaluyong Court pagtugot sa Angkas nga mohimo og operasyon.

Mikomento usab si Cebu City Mayor Tomas Osmeña labot sa nahimong ruling sa SC.

Sa post niini sa iyang official Facebook page, ang mayor miingon nga ang desisyon sa Korte Suprema makaapekto sa mga residente sa siyudad diin ang habalhabal maoy ilang transportasyon.

“The ruling of Angkas is detrimental to many people in Cebu City. Habal-habals, especially in the mountain barangays, are simply a fact of life because no alternative means of transportation exists”, tipik sa post sa mayor.

Kini midugang nga ang Angkas drivers luwas nga mopasakay sa mga pasahero paingon sa ila destinasyon kay nag-obserbar sab sila og safety measures.

Samtang si Konsehal Dave Tumulak, tsirman sa Committee on Public Order and Safety naguol sab sa pagpahunong sa operasyon sa Angkas.

“So kinahanglan i-reconsider and to regulate lang siguro ang mga motor, dili dakpon kay unfair kaayo sa mga commuters like me ug sa mga drivers nga maoy source of income. So kinahanglan ni siya naay compromise agreement to acknowledge the motorcycle for hire”, matod ni Tumulak.

Gitin-aw usab sa tigpamaba sa Cebu City Police Office nga si PSIns. Arieza Otida nga wala pa silay nadawat nga kamanduan nga panakpon ang mga drayber sa Angkas, gawas na lang kon aduna silay traffic violations.(Decemay P. Padilla ug Camille L. Pateres/DILT)(BANAT NEWS)